غرامات الغياب من المدارس

من أول يوم ١٩ أغسطس ٢٠٢٤ غرامة غياب الأطفال من المدارس زادت ⬆️

هل أي غياب من المدرسة ممكن تدفع عليه غرامة ؟

لا مش أي غياب

في شرطين عشان ال council يقدروا يبعتولك غرامة:

الأول: لازم يكون الغياب unauthorised يعني المدرسة مش مقتنعة بالسبب اللي كتبته في طلب الغياب (غالباً مش بيقتنعوا غير بالأعياد الدينية أو طبعاً لو الطفل نفسه مريض)

الشرط التاني: يكون الغياب مدته أكتر من 10 sessions في خلال ١٠ أسابيع متتالية، ال 10 sessions دول ما يعادل ٥ أيام دراسية.

وال ١٠ أسابيع ممكن يكونوا خلال ترمين مختلفين أو سنتين دراسيتين مختلفتين.

يعني لو مثلاً غيبت الطفل ٣ أيام في آخر ترم الصيف اللي هو بيخلص ف يوليو و ٣ أيام في أول ترم الخريف اللي هو بيبدأ في سبتمبر ، كده مع بعض هيتحسبوا أكتر من ٥ أيام لأن المدة بينهم أقل من ١٠ أسابيع وممكن يدفعوك عليهم غرامة مع إن الطفل أصلاً بدأ سنة دراسية مختلفة.

الغرامة اللي هتزيد دي هتبقى 160£ لكل parent لكل طفل ولو دفعتوها خلال ٢١ يوم هتتخفض ل 80£

الحد الأقصى غرامتين اتنين خلال ٣ سنين لنفس الطفل.

الغرامة التانية في خلال ٣ سنين هتبقى 160£ مفيهاش تخفيض حتى لو دفعتها بدري ولو مادفعتهاش خلال ٢٨ يوم هيقاضوك في المحكمة أو يتخذوا اجراءات قانونية أخرى ضدك.

لو غيبت الطفل ٣ مرات أو أكتر خلال ٣ سنين مش هيبقى في غرامة لكن برضه ممكن يقاضوك في المحكمة أو يتخذوا اجراءات قانونية أخرى ضدك.

طيب لو لاقدر الله رحت المحكمة ممكن يحكموا عليك ب ايه ؟

مبدئياً لو المحكمة حكمت انك guilty ممكن يظهر مستقبلاً في شهادة ال DBS بتاعتك (اللي هي زي الفيش والتشبيه)

غير كده

ممكن المحكمة يدفعوك غرامة تصل إلى ألفين ونص باوند

ممكن يحكموا عليك بالسجن لمدة تصل إلى ٣ شهور

ممكن community order أو parenting order

ال parenting order ده بيحكموا عليك انك لازم تاخد دروس في التربية وتعمل اللي المحكمة تؤمر بيه عشان تحسن نسبة حضور أطفالك للمدرسة.

طيب لو الأولاد أصلاً مش مسجلين في مدرسة ؛ لو الكونسيل معتقد إن أولادك مش بيتعلموا تعليم مناسب لسنهم، المفروض يبعتولك notice بيدوك مهله ١٥ يوم تثبت إنك مسجل الأولاد في مدرسة أو إنك بتعلمهم تعليم منزلي. لو ماقدرتش تثبت ده بيبعتولك جواب تاني بيعرفوك انهم هيتخذوا اجراء قانوني ضدك اسمه School Attendance Order ب اسم مدرسة معينة (يعني هيطلبوا منك تسجل لطفلك في المدرسة الفلانية) وممكن يدوك اختيارات لمدارس أخرى أو لو انت مثلاً هتسجله ف مدرسة خاصة أو مدرسة تبع كونسيل تاني تعرفهم اسم المدرسة اللي ناوي تسجل فيها خلال ١٥ يوم برضه عشان يبعتوا اسمها في ال SAO و هم المفروض بيتواصلوا مع المدرسة اللي هيحطوا اسمها قبل ما يبعتولك.

لما يبعتولك ال SAO المدرسة اللي مذكور اسمها فيه لازم تسجل الطفل فيها وإلا هيعتبر offence/جريمة وهيودوك المحكمة ويدفعوك غرامة إلا لو قدرت تثبت انك بتعلمه تعليم مناسب في مكان غير المدرسة.

ممكن كمان الكونسيل في نفس الوقت يتخذ اجراءات قانونية أخرى زي ال Education Supervision Order لو شايفين انك محتاج support عشان تخلي أولادك يحضروا المدرسة لكن انت مش متعاون معاهم ف بيقدموا طلب للمحكمة انهم يعينوا مشرف يساعدك عشان تخلي أولادك يتعلموا. ممكن يعملوا ال ESO مع أو بدل ال SAO.

في councils في الطراوة وفي منهم صارمين وبينفذوا القوانين دي فعلاً.

ربنا يكفينا شر الغرامات والمحاكم 😄

Enjoy the rest of your summer holiday 🌞

#انجلترا_وسنينها