الخطوط العريضة لنظام التعليم في انجلترا

مما لا شك فيه إن نظام التعليم في انجلترا معقد بعض الشئ

في البوست ده هذكر بعض الخطوط العريضة وان شاء الله في بوستات لاحقه هشرح أكتر عن كل مرحلة لوحدها

⬅️ الطفل اللي بيكمل ٤ سنين قبل ١ سبتمبر بيدخل Reception (ما يعادل KG1 في مصر)

ولما يكمل ٥ سنين بيدخل أول مراحل التعليم الإجباري Compulsory education اللي هي year 1 أو أولى ابتدائي ( ما يعادل KG2 في مصر)

وهكذا لحد year 13 (ما يعادل ٣ ثانوي في مصر)

الفرق في المسميات فقط لكن في الآخر الطالب بيدخل الجامعة في نفس العمر.

⬅️ المدارس الإبتدائي في انجلترا primary school بتبقى لحد year 6

- في year 2 الطالب بيمتحن امتحان اسمه SATs KS1

- في year 6 الطالب بيمتحن SATs KS2 ده اجباري كل الطلاب لازم يمتحنوه

- (ملحوظة: امتحانات SATs اتكنسلت لسنة ٢٠٢٠/٢١ بسبب الكورونا بس هترجع تاني السنة دي ان شاء الله)

https://www.gov.uk/guidance/primary-assessments-future-dates

- في امتحان تاني اسمه 11+ بيبقى مطلوب لو هتقدم في مدرسة grammer أو private وقله من المدارس الحكومي بيطلبوه كشرط للقبول.

⬅️ من أول year 7 الطالب بيدخل مدرسة ثانوي secondary school

- في year 10 و year 11 الطالب بيدرس منهج ال GCSE بعد ما يكون اختار المواد في year 9 ( في مدارس بتبدأ بدري سنه بمعنى إن الطالب بيختار المواد في year 8 ويدرسها في year 9&10&11 )

- في نهاية year 11 الطالب بيمتحن مواد ال GCSE وفي مدارس بتقسم الامتحانات بين year 10 & year 11

⬅️ لما الطالب يكمل ١٦ سنه يعني يكون خلص year 11 في الدراسه، وأخد شهادة ال GCSE بيكون كده خلص التعليم الإجباري وفي سكوتلاند و ويلز ممكن يسيب الدراسه عادي لكن في انجلترا لازم يفضل يتعلم لحد سن ١٨ سنه إما يكمل year 12&13 لو درجاته في ال GCSE تسمحله أو يبدأ apprenticeship or traineeship بتكون كورسات بتأهله للشغل أو يكمل تعليم part-time بس في نفس الوقت يشتغل أو يتطوع ع الأقل ٢٠ ساعه في الاسبوع.

https://www.gov.uk/know-when-you-can-leave-school

⬅️ آخر سنتين في الثانوي year 12 & year 13 اسمهم sixth form في نهايتهم الطالب بيحصل على شهادة اسمها A Levels وفي ناس بتختار تاخد (BTEC)

في مدارس ثانوي بيكون فيها sixth form يعني الطالب ممكن يفضل فيها لحد year 13 وفي مدارس ثانوي مفيهاش sixth form بتكون لحد year 11 بس وفي الحالة دي لو الطالب عايز يكمل آخر سنتين year 12 & year 13 هيحتاج يقدم في college يدرس فيها ال sixth form والتقديم بيكون في بداية year 11.

⬅️ تكلفة التعليم:

- التعليم في المدارس الحكومية من سن ٤ سنين لحد ١٨ سنه مجاني.

- التعليم الجامعي كله بفلوس إلا لو الطالب حصل على منحه scholarship ، وفي طلبه ممكن ياخدوا قرض دراسي (له شروط).

#انجلترا_وسنينها