امتحان السواقة العملي 🚘

البعبع الكبير 😂

طب هو ليه صعب وناس كتير بتسقط فيه كذا مرة ؟

لأن الغلطة ب فورة

يعني غلطة واحده بس major بتسقط

أو ١٥ غلطة minor حتى لو مفيش ولا واحدة major تسقط برضه

المشكلة إن اللي بيعتبروها غلطات major دي احنا بنعملها كل يوم واحنا بنسوق عادي 😂

ف الامتحان ده عبارة عن تمثيلية هتعرف تمثل طول مدة الامتحان إنك سواق حريص و رزين وف نفس الوقت مابتخافش هتنجح ✔️

لكن هتتوتر هتغلط هتسقط ✖️

ف أهم حاجة نحاول نبقى ريلاكس ومركزين جداً 👀

🛞 مبدئياً عشان تتعلم أو تستعد للامتحان العملي لازم يبقى معاك رخصة provisional و ده لينك بوست الرخصة وازاي نطلعها

https://www.facebook.com/share/p/19D3THqDxZ/?mibextid=wwXIfr

لازم وانت بتتعلم تسوق يكون في حد راكب معاك قدام. الحد ده ممكن يكون مدرب سواقة أو حد من قرايبك أو أصحابك عمره فوق ٢١ سنة ومعاه رخصة كاملة من أكتر من ٣ سنين ولو بتتعلم مانيوال لازم رخصته تكون مانيوال هو كمان وممنوع يستخدم موبايله وانت سايق يعني يركز معاك. و غير مسموح تسوق على ال motorway إلا لو معاك مدرب سواقة ماينفعش حد قريبك أو صاحبك.

ولو بتتعلم على عربيتك أو عربية حد قريبك أو صاحبك لازم تلزق استيكر حرف L على العربية front and back في شروط للاستيكر ده من حيث اللون والحجم هتلاقوها ف اللينك ده https://www.gov.uk/government/publications/l-plate-size-rules/l-plate-sizes. كمان لازم تتأكد إن في insurance مغطيك ك learner driver. طبعاً لو عربية المدرب هو بيكون مظبط التأمين.

لو ما التزمتش بالشروط دي واتقفشت انت اللي هتتحاسب وممكن تدفع غرامة و تاخد نقط على رخصتك ال provisional.

ممكن تستخدم الفورم دي عشان تسجل ال progress بتاعك وتتأكد انك جاهز للامتحان

https://assets.publishing.service.gov.uk/media/63e22670e90e07625ea0bc17/learning-to-drive-lesson-by-lesson.pdf

🚘 يوم الامتحان :

📌 طبعاً ماننساش رخصة السواقة ال provisional واحنا رايحين الامتحان.

📌 لو هتستخدم عربيتك في الامتحان في شروط هتلاقيها في اللينك ده

Driving test: cars: Using your own car for your test - GOV.UK

🚘 أجزاء الامتحان :

ده شكل الفورم اللي الممتحن بيستخدمها خلال الامتحان عشان يقيمك

👀 أول حاجه ف الامتحان لازم يشوف نظرك سليم ولا لأ

قبل ما تركبوا العربية هيقولك اقرأ رقم العربية اللي هناك دي ( اللي هي على بعد ٢٠ متر ).

🗣️ تاني جزء في الامتحان اسمه ‘show me, tell me’

جزء tell me بيبقى أول ماتركبوا العربية قبل ما تسوق هيسألك سؤالين متعلقين بال Vehicle safety يعني مثلاً ازاي تتأكد إن الفرامل شغالة أو النور بتاع العربية شغال أو ممكن يقولك افتحلي كبوت العربية واتأكد إن فيها زيت كفاية مثلاً.

وجزء show me بيبقى خلال الامتحان وانت سايق هيقولك افتح الشباك واقفله مثلاً أو شغل ال demister عشان يتأكد إنك بتعرف تعمل الحاجات دي وأنت سايق عادي بدون ماتفقد السيطرة على العربية.

أي مدرب سواقة بيبقى طابع كل الأسئلة اللي ممكن تجيلك في ورقة بيديهالك ويدربك عليهم ع العربية برضه هم سهلين جداً وحتى لو جاوبتهم غلط مش بتسقط بتعتبر minor fault إلا لو فقدت السيطرة على العربية في جزء show me ممكن يعتبرها major fault ويسقطك.

هتلاقوا الأسئلة كلها في اللينك ده

Car 'show me, tell me' vehicle safety questions - GOV.UK

🚙 جزء السواقة نفسه بقى بيبقى مدته تقريباً أربعين دقيقة أو أقل شوية

🚥 في الأول بيسألك لو عايز المدرب بتاعك يركب معاك خلال الامتحان ممكن يركب ورا معظم الناس بترفض عشان ماتتوترش زيادة بس لو حابب يركب معاك عادي.

مش شرط المدرب ممكن يكون حد قريبك أو صديقك بس لازم يكون أكبر من ١٦ سنة ولازم يلتزموا بشوية ارشادات كده هتلاقوها في اللينك ده

Sit in and observe driving tests - GOV.UK

أحياناً بيبقى في supervisor بيشرف على الممتحن هيركب ورا ومش من حقك ترفض لأن ممكن يكنسلوا امتحانك لو رفضت.

🚥 النص الأول من الامتحان بيبقى اسمه independent driving

إما بيقولك امشي ع ال sat nav وهو بيجيب الجهاز بتاعه معاه

أو بيقولك follow the signs to المكان الفلاني (السيتي سنتر مثلاً) ومش لازم توصل للمكان ده لأنه أحياناً بيبقى بعيد هتمشي لحد ما وقت الجزء ده يخلص اللي هو حوالي عشرين دقيقة وبعدين هو هيقولك تعمل ايه.

لو انت مش شايف اليفط لو الشجر مغطيها مثلاً قوله عادي وهو هيقولك تمشي ازاي. وحتى لو دخلت في شارع غلط المفروض مش هتسقط بسببها، تعتبر minor fault.

مفيش أي ضمان يجيلك ده أو ده بيبقى حسب الممتحن و مزاجه.

🚥 الجزء التاني من الامتحان بيبقى dependent driving بعد ما تخلص الجزء الأول بيقولك من دلوقتي أنا هقولك التعليمات تمشي ازاي وفعلاً هو بيقولك امشي على طول أو ادخل يمين ادخل شمال لحد ما ترجع ال test centre

لو بتدرب مع instructor لازم يعلمك على كل ده ويعملك mock tests وبيبقى عارف ال test routes كمان، بيبقوا طرق معينة بيجيلك واحد منهم يعني المفروض لو ال instructor بتاعك شاطر ماتمشيش في أي طريق جديد عليك وأنت بتمتحن هيكون لففك فيهم كلهم.

لو عملت سيرش على جوجل ب اسم السنتر اللي هتمتحن فيه مثلاً xxxx driving test centre routes ممكن تلاقي الطرق بالاتجاهات بتاعتها. بس خلوا بالكم إنهم كل فترة بيعملوا update ل ال test routes دي ف شوفوا أحدث حاجة متاحة.

🚥 خلال الامتحان هيطلب منك كذا مره تركن على جنب ولازم هيقولك when it is safe ف لازم تتأكد الأول إنك في مكان ينفع تركن فيه. وبعد ماتركن هيقولك اطلع لو safe برضه وطبعاً تبص حواليك في كل الزوايا قبل ما تتحرك.

🚥 ممكن كمان يقولك اعمل Emergency stop

هينبهك الأول إنه هيطلب منك emergency stop كمان شويه و هياخدك في شارع هادي السرعة فيه ٢٠ غالباً وهيقولك STOP ✋🏼 لازم تفرمل بسرعة من غير ماتفقد السيطرة على العربية وتقف تماماً وتجيب الجير ع الباركينج وبعد كده هيقولك كمل لو الطريق أمان ف تبص حواليك ف كل الاتجاهات وتعمل ال 6 points check قبل ماتتحرك.

🚥 كمان لازم يمتحنك في واحده على الأقل من أربع manoeuvres هتلاقوا ليهم ڤيديوهات كتير على اليوتيوب

1️⃣ أول واحده Pulling up on the right

يعني تركن على يمين الطريق وطبعاً هيقولك لما تحس إنه safe ف لازم تاخد بالك كويس قبل ما تركن وتتأكد إنه أمان إنك تركن ف الوقت ده ف المكان ده. وبعدين ترجع للخلف مسافة عربيتين وتاخد بالك وانت بترجع من المسافة بينك وبين الرصيف.

التانية والتالتة Bay parking

الركنه في الباركينج العادي بين خطين وليها طريقتين

2️⃣ Forward يعني تركن بوش العربية

هيقولك drive into

3️⃣ Reverse يعني تركن بضهر العربية

هيقولك reverse into

وطبعاً لازم ماتلمسش الخطين وأنت راكن وممكن يفتح الباب بتاعه عشان يتأكد.

عشان تسهل على نفسك شوف ركنه على يمينك وخطين يكون يمينهم وشمالهم فاضي لو في ، مش لازم تروح تلزق جنب العربيات اللي راكنه.

4️⃣ رابع وأصعب واحدة Parallel parking

يعني تقف موازي لعربية راكنه على شمالك وتركن وراها.

🚥 بعد ماترجع السنتر الممتحن هيقولك النتيجة و لو المدرب بتاعك ماركبش معاك في الامتحان لما ترجعوا السنتر هيسألك لو عايزه يركب قبل ما يقولك النتيجة عشان لو لاقدر الله سقطت المدرب يعرف أخطاءك ويدربك عليها قبل ما تمتحن تاني.

❌ غلطات شهيرة تخلي بالك منها

• ال blindspots و checking the mirrors

مهم جداً تفضل تبص في المرايات وتبص بجسمك كله مش بعينك بس عشان الممتحن ياخد باله إنك بتبص. (مش بقولكم تمثيل🙄)

• السرعة طبعاً ماتعديهاش وماتمشيش أبطأ منها بكتير برضه يعني لو شارع ٣٠ ومشيت على ٢٤ ممكن يسقطك. لو أنت مش متأكد السرعة كم والشارع فيه عواميد إنارة تبقى ٣٠ لو السرعة أقل أو أكتر هتلاقي signs مكتوب عليها الرقم.

• اشارات المرور، أول ما الحمرا تمشي تتحرك على طول، ممكن تعدي وهي صفرا يعني لو الاشارة خضرا وأنت بتعدي الخط خلاص اصفرت كمل ماتقفش.

• ال zebra crossing لو حد بيفكر لسه يعدي ولا لأ تقف لحد ما يقرر ويتحرك ويوصل لبر الأمان الناحية التانية.

• ال give way لازم تقف وتبص وتتأكد قبل ما تتحرك حتى لو الشارع فاضي.

• ال roundabouts منها لله مش هقول فيها أكتر من كده انتو عارفين بقى!

• لو بتعمل أي manoeuvre وفي أي عربية ظهرت تقف وتستنى لما تعدي وبعدين تكمل. والعكس لو شفت أي عربية بتركن قدامك استنى لحد ماتركن ماتقربش منها أوي.

• ماتخبطش الرصيف و أنت بتركن أو تركن عليه أو تركن بعيد عنه.

• لو ماشي ف شارع ضيق وعربيات راكنه ماتلزقش فيهم أوي. تسيب مسافة فتحة الباب.

• ماتنساش تنزل الهاند بريك قبل ما تبتدي تتحرك.

• الاشارات، تفتكر تدي اشارة وانت داخل يمين أو شمال أو هتتحرك من lane ل التانية وتعملها في الوقت الصح مش بدري أوي ولا متأخر أوي.

• ال bus lanes ماتمشيش فيها طبعاً واسأل المدرب بتاعك قبل الامتحان على كل أماكن ال bus lane اللي ممكن تمتحن فيها. هم مش كتير عموماً ، ممكن السنتر اللي بتمتحن فيه مايكونش فيه ولا bus lane حواليه أصلاً.

• و أنت بتلف يمين أو شمال خلي بالك أحياناً ف أول الشارع خالص بيكون في اشارة ل الناحية التانية من الطريق مش بتاعتك وطبعاً بتكون حمرا لأن اشارتك خضرا ف ماتقفش فيها لو وقفت حتى لو ثواني هتسقط. (دي غير اشارة المشاة.)

• لو الممتحن اضطر يتدخل اتأكد إنك سقطت يعني لو داس الفرامل بتاعته أو لمس الدركسيون أو الفتيس أو عمل أي حاجة وأنت سايق لأن ده معناه إنه شايف إنك مش safe.

🛞 لو لا قدر الله سقطت هتحتاج طبعاً تحجز امتحان تاني وتدفع تاني و لازم معاد الامتحان يكون بعد ١٠ أيام على الأقل.

طبعاً مش هتلاقي بعد ١٠ ولا ٢٠ يوم حتى، احجز أول معاد تلاقيه وبعدين ادخل على أبلكيشن Testi هيجيبلك مواعيد امتحانات الناس اللي بتكنسل ممكن تلاقي مواعيد قريبة بس بتطير بتتحجز تاني بسرعة جداً ف ماتستناش لما الأبلكيشن يبعتلك notification اقعد كل شويه اعمل ريفريش. أنا كنت بعمل كده وبلاقي امتحانات قريبة أقل من أسبوعين مثلاً.

ليك تقريباً ٦ مرات تغير فيهم معاد امتحانك بعد كده مابتقدرش تغيره.

لو عندك رفاهية اختيار ساعة الامتحان، تجنب ساعات الذروة اللي هي الصبح والناس رايحة المدارس والشغل وآخر النهار والناس راجعة من المدارس والشغل. يعني من ١٠ ل ١ كده حلو أوي.

لو مالقيتش غير الوقت ده ماتقلقش برضه أحياناً بتكون الزحمة ميزة وبتضيع وقت الامتحان بدون ماتلف كتير.

🛞 لو حاسس إن الممتحن ظلمك وماكنش قانوني معاك ممكن تعمل appeal بس حتى لو قبلوه مش بيغيروا نتيجة الامتحان بس ممكن يدوك امتحان تاني ببلاش.

كل المعلومات عن ال appeal هتلاقوها في اللينك ده

https://www.gov.uk/guidance/appeal-your-driving-test

🛞 طيب الحمدلله ربنا سترها معاك ونجحت هيديك شهادة ورقية إنك نجحت والرخصة هتتبعت في البريد على عنوانك بس مش لازم تستناها عشان تسوق أول ما تخلص الامتحان وتاخد الشهادة تقدر تسوق على طول بس ماتنساش تبلغ شركة التأمين.

🛞 لو امتحنت على عربية اتوماتيك الرخصة هتطلعلك اتوماتيك فقط يعني ماينفعش تستخدمها عشان تسوق عربية مانيوال.

لكن لو امتحنت على عربية مانيوال ممكن تسوق بالرخصة مانيوال أو اتوماتيك.

طيب لو أخدت رخصة اتوماتيك وحبيت تغير بعد كده وتخليها مانيوال لازم تمتحن العملي تاني على عربية مانيوال بس مش لازم تمتحن النظري تاني. وممكن تتعلم السواقة المانيوال برخصتك الاتوماتيك عادي مش محتاج provisional تاني. بس لازم كل شروط التعليم التانية اللي قولناها فوق. ( L ع العربية - حد جنبك ).

لو انت معاك رخصة اتوماتيك وامتحنت مانيوال وسقطت ممكن تستمر في السواقة الاتوماتيك عادي.

🛞 أحياناً السنتر هم اللي بيكنسلوا الامتحان لو الجو وحش مثلاً في تلج أو شابورة فظيعة أو رياح شديدة. أو لو المدرب اللي هيمتحنك تعب مثلاً ومش لاقين حد تاني. وفي الحالة دي بيحجزولك امتحان تاني في أقرب معاد متاح وممكن تغيره لو مش مناسب. ومش بيدفعوك فلوس زيادة.

لو كنسلوا قبل الامتحان بأقل من ٣ أيام عمل لأي سبب غير الظروف المناخية، ممكن تقدم على تعويض مالي لأي خسائر مالية حصلتلك بسبب ال cancellation ده زي لو كنت أخدت اليوم ده unpaid leave من الشغل أو لو أجرت عربية عشان تمتحن عليها ومعرفتش تاخد refund

هتلاقي تفاصيل أكتر وازاي تقدم في اللينك ده

https://www.gov.uk/government/publications/application-for-refunding-out-of-pocket-expenses/guidance-on-applying-for-out-of-pocket-expenses-for-a-cancelled-driving-test

لكن لو اضطروا يكنسلوا بسبب عيب في عربيتك مثلاً أو لو العربية عطلت في الامتحان أو لو أنت اللي تعبت في الامتحان مثلاً ومش هتقدر تكمل، الفلوس بتروح عليك وبتحجز تاني وتدفع تاني.

Driving test: cars: If your test is cancelled or there's bad weather - GOV.UK

طبعاً الامتحان ده سئ السمعة جداً وناس كتير جداً بتسقط فيه بس أنا أعرف كذا حد شخصياً نجح من أول مرة ومانيوال كمان وستات ورجالة ف ماتفقدوش الأمل 😄

دي خلاصة خبرتي بعد ما سقطت ٧ مرات 😂

بس ف الآخر نجحت الحمدلله من أكتر من ٥ سنين دلوقتي وعايزه أقولكم إن كل مرة كنت بسقط كنت بتعلم حاجة ف ماتستعجلوش لعله خير!

لينك بوست امتحان السواقة النظري

https://www.rahma-mahdy-agha.blog/post/theory-test-for-car-drivers

#انجلترا_وسنينها