ازاي تطلع رخصة سواقة في انجلترا ؟

ازاي تطلع رخصة سواقة في انجلترا ؟

أول حاجة لو معاك رخصة دولية ممكن تسوق بيها لمدة سنة من تاريخ دخولك البلد سواء مقيم أو سائح.

عشان تطلع رخصة انجلترا أول حاجة هتقدم على provisional driving licence يعني رخصة افتراضية عشان تعرف تدخل بيها امتحانات السواقة النظري والعملي وبعد ما تعدي الامتحانين بتاخد ال full licence اللي ممكن تسوق بيها.

بتقدم على ال provisional الأفضل أونلاين من موقع الحكومة في اللينك ده

https://www.gov.uk/apply-first-provisional-driving-licence

بتدخل بياناتك المطلوبة كلها ( ال national insurance number مش مهم لو عندك واحد اكتبه لو مش عندك عادي سيبه فاضي) وبتدفع الرسوم حوالي ٣٤ باوند. وبعد كده بيبعتولك form في البريد بتملاها وتلزق فيها صورتك الشخصية وتبعتهالهم تاني في البريد ومعاها أصل اثبات شخصية زي الباسبور أو ال BRP واحد فيهم بس كفاية. (لو مسافر قريب استنى لما ترجع وبعدين قدم عليها) بتحط الاتنين في نفس الظرف الفورم والباسبور أو البطاقة وتبعتهم من أي بوست أوفيس مع الرويال ميل الأفضل signed for guaranteed رايح جاي يعني بتدفع كمان ثمن شحن اثبات شخصيتك ليك تاني هم فاهمين ف البريد هيدوك ظرفين الاتنين مدفوعين وعليهم الطوابع وكل حاجة واحد هتحطه جوه التاني ومعاه الفورم والباسبور. بحيث هم يبعتولك باسبورك في الظرف اللي جوه ده. وبعد فترة بيبعتولك ال provisional licence غالباً اسبوع و بيبعتولك اثبات الشخصية بتاعك تاني كل واحد بيتبعت لوحده مش مع بعض.

لو مش عايز أونلاين ممكن تجيب D1 application form من البوست أوفيس وتملاها وتبعتها مع اثبات الشخصية والصورة والرسوم كله في نفس الظرف بس الرسوم بتبقى أغلى من الأونلاين حوالي ٤٣ باوند وبتاخد وقت أطول حوالي ٣ أسابيع.

بعد ما توصلك ال provisional licence بقى تقدر تحجز امتحان نظري أونلاين برضه وتاخد دروس سواقة عملي لو محتاج وبعد كده تحجز امتحان العملي ولما تنجح في الاتنين خلاص بيبعتولك full licence الرخصة اللي ممكن تسوق بيها بعدها بكم يوم ف البريد برضه.

ماينفعش تسوق بال provisional لوحدك لازم يكون في حد قاعد جنبك قدام معاه full licence من ٣ سنين ع الأقل وعمره مش أقل من ٢١ سنه. ولازم تحط ع العربية ملصق حرف L من قدام ومن الخلف. (هتلاقوا الشروط كلها في بوست امتحان السواقة العملي) إلا طبعاً لو معاك رخصة دولية وماكملتش ١٢ شهر في البلد لسه ممكن تسوق عادي سواء معاك provisional أو لأ.

ان شاء الله هتكلم في بوست تاني عن الامتحانات النظري والعملي.

بوست امتحان السواقة النظري

https://www.rahma-mahdy-agha.blog/post/theory-test-for-car-drivers

بوست امتحان السواقة العملي

https://www.rahma-mahdy-agha.blog/post/امتحان-السواقة-العملي

#انجلترا_وسنينها