Theory Test for Car Drivers
- Rahma Mahdy Agha
- Jul 26, 2021
- 3 min read
Updated: 1 day ago
امتحان السواقة النظري عبارة عن ايه ؟ و ازاي نستعد له ؟
الامتحان عبارة عن جزئين:
الجزء الأول MCQ أسئلة اختيارات بيبقوا ٤٧ سؤال وف الآخر بيبقى في scenario-based questions عبارة عن ڤيديو كليب عليه ٣ أسئلة تجاوبهم من الڤيديو ده. يعني كلهم ٥٠ سؤال وعشان تنجح لازم تجاوب ٤٣ ع الأقل صح. مدة الجزء ده من الامتحان حوالي ٥٧ دقيقة.
الجزء الأول أسئلته بتيجي من ٣ مصادر هم
- ال Highway code اللي هو قواعد المرور
- اشارات الطريق traffic signs
- مهارات القيادة the essential driving skills
كل مصدر له كتاب تقدروا تطلبوه من الموقع الرسمي أو أي موقع تاني وهتلاقوا كمان نسخ مستعملة على مواقع تانية هتكون أرخص وفي سيديهات كمان متوفرة بدل الكتب.
ف اللينك ده 👆🏻 اضغطوا على ال + اللي جنب theory test هتلاقوا الكتب
https://www.safedrivingforlife.info/free-practice-tests/practice-theory-test-for-car-drivers-1-of-2/
اللينك ده 👆🏻 فيه امتحان theory مجاني ممكن تتدربوا عليه
الجزء الثاني من الامتحان عبارة عن ڤيديوهات hazard perception الامتحان بيبقى فيه ١٤ ڤيديو كليب، كل كليب فيه هازرد واحد ماعدا كليب واحد من ال ١٤ فيه اتنين hazards ف نفس الكليب ومالوش ترتيب معين يعني ممكن يجيلك ف الأول أو النص أو ف الآخر ف لازم تركز ف كل كليب للآخر. يعني ١٤ كليب فيهم ١٥ هازرد، كل هازرد ب ٥ درجات. يعني مجموع الدرجات ٧٥ وعشان تنجح ف الجزء ده لازم تجيب ع الأقل ٤٤ من ٧٥ ، لو قعدت تضغط الماوس كتير كتير ف نفس الكليب هتاخد صفر، ف ماتضغطش أكتر من ٣ مرات مثلاً ف نفس الهازرد.
الهدف من الجزء ده انك تتعرف على أي احتمال خطر في طريقك هيجبرك تهدي سرعتك مثلاً أو تغير اتجاهك. زي مثلاً لو عربية قدامك هتركن على جنب أو لو حد بيعدي الطريق أو عربية بلو لايت أو عربية عليها علامة L يعني حد بيتعلم لسه أو عربيه طالعه بسرعه من شارع جانبي كل دي تعتبر hazards وكل اللي هتعمله ف الامتحان انك هتضغط ع الماوس لما يظهر الهازرد أو الخطر ده ف الڤيديو بس لازم تضغط الماوس ف الوقت المناسب عشان تاخد الخمس درجات لو ضغطت قبل أو بعد هتنقص درجتك. هتعرف الوقت المناسب ده بالتدريب ع الأبلكيشن أو ع الموقع.
ده لينك عليه ٣ كليبات مجاناً تتدرب عليهم بس طبعاً مش كفايه
أنا شخصياً ما اشتريتش كتب، اشتريت أبلكيشنز الموقع الرسمي اللي ف الصورة دي 👇🏻 وشايفه انها كافيه جداً عشان تنجحوا من أول مره، أهم اتنين ال theory ده أسئلة الجزء الأول ب إجاباتها طبعاً وكمان شرح ليه اختار الإجابة دي تحديداً عشان ممكن السؤال ف الامتحان يجي بطريقة مختلفه شويه ف لازم تكون فاهم المعلومة مش حافظ الأسئلة ب إجاباتها وخلاص، نفس الأبلكيشن فيه جزء هازرد برضه بس مش كليبات كتير، الأبلكيشن التاني ال hazard برضه مهم فيه كليبات هازرد أكتر حوالي ٣٠ كليب. لو ذاكرت كل الأسئلة والكليبات ف التطبيقين ان شاء الله تنجح من أول مره. لو عندك وقت ممكن تقرأ الهاي واي كود لو معندكش مش لازم ، الأسئلة كفاية.
ده لينك الأبلكيشنز
معظم الأسئلة بتيجي من الأبلكيشن ماعدا أسئلة بسيطة حوالي ٥ مثلاً بس هيجوا برضه من المصادر اللي ذكرتها فوق.
ممكن كمان تشتروا subscription من الموقع الرسمي ف اللينك ده https://www.safedrivingforlife.info/shop/official-dvsa-theory-test-kit-car-drivers-elearning/
بس ال subscription بيبقى لمده محددة شهر مثلاً أو سنه لكن الأبلكيشن بتشتريه طول العمر عادي مش محدد بوقت.
لو حد جرب أي أبلكيشن أو موقع تاني ويقدر يرشحه ممكن مشكوراً يتفضل يشاركه ف التعليقات 👇🏻
- تكلفة الامتحان ٢٣ باوند
- يوم الامتحان لازم تاخد ال provisional licence معاك وهيبعتولك ايميل بعد ما تحجز فيه كل التعليمات.
- مهم تروح قبل ميعادك بربع ساعة ع الأقل لأن لو اتأخرت مش هيدخلوك.
- كل متعلقاتك هتسيبها ف لوكر قبل ما تدخل الامتحان.
- ولو واحده محجبه قبل ما تدخل الامتحان هيطلبوا منها تقلع الطرحة في غرفة مغلقه و واحده من السنتر هتعمل check عليها.
- النتيجة بتاخدها وانت خارج على طول بيطبعوها ف ورقة ويسلموهالك.
- لو لاقدر الله مانجحتش لازم تنتظر ع الأقل ٣ أيام عشان تمتحن تاني.
- طبعاً لازم تنجح ف النظري الأول عشان تقدر تمتحن العملي، بس ممكن تاخد دروس عملي عادي قبل ما تنجح ف النظري.
- وشهادة النجاح في النظري صالحه لمدة سنتين فقط، لو مالحقتش تنجح ف العملي خلال السنتين دول هتحتاج تعيد النظري تاني.
- تقدر تحجز امتحان نظري تاني قبل ما شهادتك الحالية تنتهي ب ٦ شهور.
- حجز الامتحان النظري من اللينك ده
ان شاء الله في بوست لاحق هتكلم عن البعبع الكبير الامتحان العملي 😂
ده لينك بوست سابق عن خطوات استخراج الرخصة
بوست امتحان السواقة العملي
Comments