ازاي تستخرج فيش وتشبيه في أسرع وقت لو انت مش ف مصر ؟

ازاي تستخرج فيش وتشبيه في أسرع وقت لو انت مش ف مصر ؟

عادةً اللي محتاج يستخرج فيش وتشبيه (اللي هو صحيفة الحالة الجنائية) وهو هنا ف انجلترا دايماً بيتقاله مفيش حل غير إنك تروح القنصلية ف لندن وتنتظر حوالي ٤ ل ٦ أسابيع لحد ما يوصل وحالياً ف ظروف الكورونا ممكن يوصلوا ل ١٠ أسابيع.

لكن غير الطريقة التقليدية دي ممكن يتعمل بطريقتين تانيين أسرع بكتير في خلال اسبوع واحد أو أقل.

أول طريقة :

إنك تروح القنصلية في لندن عادي وتقولهم عايز أطلع فيش وياخدوا بياناتك وبصماتك وكل حاجة ويمضوا ويختموا ع الورق بعدين تاخد منهم الورق اللي بيحتاجوا يبعتوه مصر عشان يطلعولك الفيش ، تبعته بمعرفتك لأي حد من قرايبك ف مصر DHL أأمن وأسرع حاجة. في مصر هياخدوا الورقة دي اللي استلمتها من القنصلية يروحوا بيها فرع العباسية للأدلة الجنائية ويطلعولك الفيش من هناك يستلموه ساعتها أو تاني يوم بالكتير. أنا سألت هنا ف القنصلية ف لندن وفي مصر والاتنين أكدولي إن ده ينفع يتعمل.

الطريقة التانية:

انك تطلب من حد من قرايبك في مصر يدخل على موقع وزارة الداخلية المصرية ويعملك أكونت ويطلبلك استخراج صحيفة حالة جنائية أونلاين وبتوصل في البريد لحد البيت بعد يومين بالظبط من دفع الرسوم. والرسوم ممكن يدفعوها ع الموقع بالكارت أو ممكن ف أي فرع (فوري). لازم حد ف مصر يعملك الموضوع ده لأن موقع وزارة الداخلية المصرية مش بيفتح هنا أصلاً. العيب الوحيد في الطريقة دي انهم بيشترطوا انك تستلم الفيش بنفسك لكن ممكن حد من قرايب الدرجة الأولى يستلمه بدالك خصوصاً لو معاه بطاقتك المصرية في حالة إنك سايبها مع أهلك ف مصر أو لو عامل لحد توكيل عام زي أب أم أخ أخت. أو حتى ممكن تبعتلهم بطاقتك ف ال DHL يستلموا بيها بتوصل خلال أيام قليلة جداً زيادة احتياط يعني.

ولما يستلموا الفيش لو محتاجه في مصر يبقى خلاص محلوله أهو معاهم في مصر لو محتاجه هنا هيبعتوه بال DHL يوصلك خلال أيام. في شرط كمان بس إنك لازم تكون استخرجت فيش وتشبيه قبل كده من مصر عشان تكون بياناتك وبصماتك متسجلة عندهم.

بأكد تاني الطريقة دي مش مضمونه أوي لأن ساعي البريد ممكن يرفض يسلم الفيش لأي حد غيرك.

So you can take it on your own risk.

أنا شخصياً جربت الطريقة التانية لإني كنت محتاجه الفيش هناك ف مصر وأنا هنا وأهلي استلموه عادي من غير بطاقتي كمان.

القصة دي تنفع لو مسافر أي بلد مش شرط انجلترا ومحتاج فيش بسرعه.

ولو مش مستعجل أصلاً ممكن تعمله عادي بقى ف القنصلية في لندن وتنتظر لما يوصل بيبعتوه على عنوانك هنا ف البريد بس لازم تروح لندن تعمله بنفسك.

#انجلترا_وسنينها