ILR - Settlement
- Rahma Mahdy Agha
- Oct 4, 2023
- 6 min read
التقديم على ILR ( Indefinite Leave to Remain )
أو settlement المعروفة إعلامياً بالإقامة الدائمة 😄 لأنها بتديك الحق انك تعيش وتشتغل وتدرس في بريطانيا لأي مدة انت عايزها المهم تفضل مقيم في بريطانيا (لو خرجت بره بريطانيا أكتر من سنتين متواصلين الاقامة بتتكنسل ومش هينفع تدخل بيها بريطانيا تاني). وبعد ما تاخد ال ILR ب ١٢ شهر ممكن تقدم بيها على الجنسية British citizenship عشان تقدر تستخرج باسبور انجليزي. وتقدر كمان تقدم على benefits لو eligible ليها Benefits - GOV.UK.
في البوست ده هشرح الخطوات بالنسبة للي دخلوا البلد عن طريق Tier 2 visa
سواء skilled worker أو Health and care worker
ال main applicant و ال dependants
أولاً عشان تقدم ع ال ILR لازم تكون كملت ٥ سنين إقامة في البلد
ممكن تعمل الأبلكيشن قبل ما تكمل ال ٥ سنين ب ٢٨ يوم فقط مش قبل كده
في خلال الخمس سنين دول ماتكونش خرجت بره ال UK أكتر من ١٨٠ يوم في أي سنه
الشرط ده بينطبق على ال dependants برضه اللي هم الزوج/ة والأطفال
ممكن يقدموا مع ال main applicant لو كملوا الخمس سنين معاه لكن لو ماكملوش لسه ممكن ال main applicant يقدم على ال ILR وال dependants يعملوا extension للڤيزا الأصليه بتاعتهم اللي هي Tier 2 ولما يكملوا الخمس سنين يبقوا يقدموا ع ال ILR لوحدهم
لازم الزوج/ة ال dependant يقدموا اثبات إنهم كانوا مقيمين مع بعض الخمس سنين في بريطانيا زي أي فواتير عليها اسمهم مع بعض زي ال Council tax مثلاً أو عقد ايجار بيت أو mortgage بالإضافة لشهادة زواجهم.
بالنسبة للأطفال عشان يقدموا ع ال ILR لازم يكون الأب والأم هم الاتنين مقدمين معاهم أو بالفعل أخدوا ال ILR يعني ماينفعش الأطفال يقدموا قبل الأب والأم لكن ينفع العكس. إلا لو طبعاً أحد الوالدين متوفي أو أحد الوالدين هو اللي معاه حضانة الأطفال وبيربيهم لوحده، أوأي ظروف قهرية ممكن تؤخذ بعين الاعتبار زي إن الطفل يكون عنده مرض خطير مثلاً.
لازم طبعاً الأطفال اللي هم أقل من ١٨ سنه مايكونوش متزوجين ولا حتى زواج مدني.
لو الطفل أكبر من ١٦ سنه هيحتاج اثبات محل اقامته بتاريخ مش أكتر من شهر من تاريخ الأبلكيشن زي كشف حساب بنكي، رخصة سواقه، جواب رسمي من جامعتهم أو جواب تسجيل في ال NHS. لو مش مقيم مع ال main applicant ف نفس البيت لازم تشرح السبب وتثبت انك بتدعمه مالياً. يعني باختصار تثبت انهم لسه معتمدين عليك مادياً ومش مستقلين بحياتهم لسه.
طيب لو عندك أولاد أكبر من ١٨ سنه ممكن تقدملهم معاك بشرط لو كانوا دخلوا انجلترا أول مره ك dependents عليك وكان سنهم أقل من١٨ سنه وقتها وتثبت برضه انهم لسه معتمدين عليك مادياً ومش مستقلين بحياتهم ولا متزوجين.
ثانياً لازم تكونوا ما أخدتوش أي public funds طول فترة وجودكم في بريطانيا ال main applicant وال dependents.
ثالثاً مرتبك المفروض مايقلش عن رقم معين سواء ف السنه أو ف الساعه المبلغ بيختلف من وظيفة للتانية
تقدروا تعرفوا الحد الأدنى لوظيفتكم من اللينك ده Indefinite leave to remain if you have a Skilled Worker, T2 or tier 2 visa: Financial requirements - GOV.UK
رابعاً محتاج تنجح ف امتحان Life in the UK و الdependants لو سنهم وقت التقديم من ١٨ ل ٦٤ سنه لازم هم كمان يمتحنوا Life in UK Test
تفاصيل عن الامتحان في البوست ده
خامساً اثبات معرفة اللغة الانجليزية
الdependants لو سنهم وقت التقديم من ١٨ ل ٦٤ سنه محتاجين يثبتوا معرفتهم باللغة الانجليزية وقت التقديم ع ال ILR
طرق الاثبات في البوست ده
لكن انت ك main applicant مش محتاج تمتحن تاني لأنك أثبت بالفعل وقت دخولك البلد أول مره بامتحان الأيلتس أو غيره ف ممكن ترفق نفس شهادة الامتحان اللي دخلت بيها أول مرة حتى لو منتهية الصلاحية والأفضل لو معاك شهادة من بريطانيا سواء جامعية أو ماجستير أو زمالة أو غيرها ترفقها مع الأبلكيشن برضه.
سادساً لازم تثبت إن ال sponsor بتاعك أو مكان عملك لسه محتاجك.
في بعض المعلومات هتحتاجها من ال HR من مكان شغلك عشان تملى الأبلكيشن ف هتبعت ايميل لل HR تقولهم
I am currently applying for ILR and would be grateful if you could send me a letter including the following information:
Standard Occupational Classification (SOC) code
Annual salary
Confirmation that this salary is appropriate for the job as stated in the code of practice for tier 2 sponsors.
Weekly hours worked
That I am still required to work at مكان شغلك in question for the foreseeable future.
هترفق الخطاب اللي هيبعتوه بالبيانات دي مع الأبلكيشن بتاعك. لو اشتغلت ف أماكن تانيه قبل كده الأفضل تاخد منهم letter برضه وترفقه مع الأبلكيشن.
سابعاً الأبلكيشن نفسه
التقديم ع ال ILR بيكون أونلاين فقط وكل واحد بيعمل أبلكيشن لوحده حتى الأطفال.
وانت بتعمل الأبلكيشن هتحتاج كل التواريخ اللي دخلت وخرجت فيها من بريطانيا وال dependants كمان حتى الأطفال، ف ابدأ سجلهم من دلوقتي ف نوته عندك (لو مش فاكر التواريخ هتلاقيها ف أختام الباسبور).
في آخر الأبلكيشن بيديك checklist بالأوراق اللي لازم تقدمها زي باسبوراتك كلها القديمة والجديد وتعمل سكان لكل الصفح اللي فيها أختام ف الباسبور، وال BRP الأخيرة، وشهادات الميلاد، وهيظهرلك لينك فيه اقرار تطبعه وتمضيه وترفقه مع الورق بتاعك برضه و لازم تعمل الاقرار ده لكل ال dependents. الزوج والزوجة كل واحد يمضي صفحة من الاقرار. https://visas-immigration.service.gov.uk/documents/family_consent.pdf
ممكن كمان تضيف payslip وكشف حساب بنكي والأطفال ممكن تقارير من المدرسة أو من ال NHS عليها اسمهم وعنوانكم. أي ورقة تلاقيها ف طريقك اعملها سكان وحطهالهم مفيش ليميت لعدد الأوراق اللي ممكن ترفقها مع الأبلكيشن ف لو شاكك زود مايهمكش.
وبرضه ماتقلقش لو نسيت حاجة لأن لو الأبلكيشن بتاعك ناقص حاجة مش هيترفض قبل ما يبعتولك ايميل ويقولولك ايه اللي ناقص بالظبط ويدوك مهله ١٠ أيام ترد عليهم فيها ف خلو عينكم ع الايميل وبصوا عليه كل يوم وانتو منتظرين القرار.
وأخيراً لازم تدفع رسوم الأبلكيشن
الرسوم بتختلف حسب المدة الزمنية اللي هياخدوا فيها قرار سواء بالقبول أو الرفض لطلب الإقامة بتاعك
للأسف الرسوم زادت من أول النهاردة ٤ أكتوبر ٢٠٢٣ هقولكم الرسوم الجديدة بس مش هذكر الأرقام قبل الزيادة منعاً لـ اللخبطة
أول وأرخص اوبشن standard service بيكلفك 2885£ لكل فرد وفي الحالة دي القرار بيوصلك غالباً خلال ٦ شهور بعد موعد البصمات.
تاني اوبشن priority service بيكلفك 3385£ للفرد وفي الحالة دي القرار بيوصلك غالباً خلال ٥ أيام عمل بعد موعد البصمات.
ثالث اوبشن super priority service بيكلفك 3885£ للفرد وفي الحالة دي القرار بيوصلك غالباً بعد يوم أو يومين عمل بعد موعد البصمات.
ملحوظة مهمة: أول ما تعمل submit للأبلكيشن ماينفعش تسافر بره البلد قبل ما يوصلك قرار في الأبلكيشن بتاعك، لو سافرت خارج (UK, Ireland, the Channel Islands or the Isle of Man) هيعتبروك بتسحب الأبلكيشن وهتضيع عليك الفلوس.
ملحوظة تانية: المواعيد دي طبعاً ماتعتمدش عليها أوي لأن ممكن جداً تكون عامل أغلى اوبشن وبعدين تاني يوم يبعتولك ايميل يقولولك معلش احنا عندنا سؤال أو محتاجين الورقة الفلانية ومنتظرين ردك ف خلال ١٠ أيام وحتى لو رديت على الايميل بتاعهم ف نفس اليوم ممكن مايردوش عليك تاني غير بعد ال ١٠ أيام وممكن لما يردوا تاني يطلبوا أو يستفسروا عن حاجة تانيه برضه فما أنصحش أبداً إن أي حد يعمل ال super priority بصراحه، ممكن تعملوا ال priority لو معاكم فلوس كفاية لأنها تستاهل (خصوصاً لو ليكم أهل بره البلد هيبقى صعب اوي تفضل مربوط هنا ال ٦ شهور منتظر الرد لو حد من قرايبك لاقدر الله اتوفى ولا تعب أوي ولا أي ظروف طارئة حصلت مش هتعرف تسافر!) بس تعملوا حسابكم إن الرد هيوصل خلال اسبوعين أو تلاته مثلاً مش ٥ أيام بالظبط يعني يفضل ماتحجزوش سفر بره البلد قبل المدة دي ع الأقل.
لو محتاج مساعدة في الأبلكيشن ممكن تكلم الرقم اللي ف اللينك ده Get help with your online Home Office application - GOV.UK
بعد ما بتخلص الأبلكيشن بتحتاج تحجز ميعاد في أحد فروع ال UKVCAS عشان ياخدوا بصماتك ويصوروك وممكن يعملوا سكان للورق بتاعك (بفلوس زيادة) وممكن انت تعمل سكان للورق بنفسك من ع الموقع.
الموعد ده ممكن تحجزه بفلوس وممكن ببلاش بس المواعيد المجانية بتكون بعيدة يعني بعد حوالي شهر وبينزلوها ع الموقع الساعة ٩ الصبح. المواعيد اللي بفلوس كمان أسعارها مختلفه حسب الساعة كم والأيام غالباً بتكون بحوالي 100£ وشويه للفرد وبينزلوها ع الموقع الساعة ١٢بالليل. وفي بعض الفروع فيها خدمة meet and great بتكون تقريباً ب 275£ للفرد وشامله خدمات كتير زي الscan بتاع الورق وأهم ميزة انك ممكن تلاقي ميعاد تاني يوم على طول بس المواعيد مش بتبقى ع الموقع بتعمل استفسار عن الخدمة من الموقع وهم بيتصلوا عليك يقولولك المواعيد المتاحة وتحجز وتدفع بالتليفون.
بعد ما تخلص الموعد ده هيبدأ العد ل المدة اللي محتاجين ياخدوا فيها القرار اللي هي ٦ شهور لو ستاندرد أو ٥ أيام لو بريورتي وهكذا.
كارت الإقامة الدايمة نفسه بينتهي بعد سنتين، طبعاً بعد سنه واحده ممكن تقدم ع الباسبور وف الحالة دي مش هتحتاجه تاني لكن لو مش عايز تقدم ع الباسبور أو ظروفك لا تسمح انك تاخد الجنسية البريطانية (زي مثلاً انك تكون حامل لجنسية بلد لاتسمح بازدواج الجنسية) هتحتاج تقدم على كارت جديد من اللينك ده Biometric Residence Permit Replacement Service
حالياً أي كارت جديد بيطلع بيكون مكتوب عليه تاريخ الانتهاء ٣١ ديسمبر ٢٠٢٤ ده مش تاريخ انتهاء اقامتك ماتقلقش ده التاريخ اللي هم حاطينه ك deadline عشان يبطلوا استخدام الكروت ال physical دي وتبقى كلها ديچيتال وأونلاين فقط.
في ايميل مخصص ل اللي بيشتغلوا ف ال NHS لو عايزين يستفسروا عن الأبلكيشن بتاعهم
لو انت مش على Tier 2 visa أصلاً في طرق تانية برضه ممكن من خلالها تقدم على ILR هتلاقوها ف اللينك ده
الناس اللي أخدت ال ILR بالفعل ياريت تشاركوا معانا تجربتكم القرار وصل بعد قد ايه وهل احتاجوا منكم أي أوراق اضافية ولا لأ ؟
اللي ما أخدوهاش لسه يلا اعملوا حصالة وابدأوا حوشوا فلوس الأبلكيشن من دلوقتي 😄
بالتوفيق للجميع
شكرا ليكي :)