Childcare Options
- Rahma Mahdy Agha
- Oct 9, 2024
- 6 min read
Updated: Dec 22, 2024
كل أم عايزه تشتغل ومش عارفه تودي أطفالها فين وهي ف الشغل البوست ده ليكي
طبعاً مشكلة كبيرة بتواجه كل أم بتشتغل أو عايزة تشتغل هي ال childcare بما إني بشتغل full time ف ال NHS وعندي نبطشيات وشفتات نايت وكده ف هفيدكم بعصارة خبرتي في الموضوع ده 😄
أولاً ما أنصحش أي أم انها تشتغل قبل ما طفلها يكمل ٣ سنين لانك ممكن تصرفي ف ال childcare أكتر من نص مرتبك ، إلا طبعاً لو عندك حد يقعد بيه وانتي ف الشغل زي والده أو أي حد من العيلة توكلي على الله.
بعد ٣ سنين الطفل بيروح النيرسري و بيبقى له ١٥ ساعة ف الاسبوع مجاناً وهتلاقوا تفاصيل أكتر عن مرحلة النيرسري ف البوست ده
لو طفلك له ١٥ ساعه بس مجاناً ، النيرسري غالباً بيبقى عندهم أوبشن انك تكملي باقي ساعات الاسبوع بفلوس.
ساعات العمل بتختلف من نيرسري ل التانية ف اسألي ف كذا مكان وشوفي الأنسب لظروفك.
وطبعاً لو سنه أقل من ٣ سنين ومالوش ساعات مجانية ممكن توديه طول اليوم وتدفعيله عادي.
من أول ٤ سنين الطفل بيروح المدرسة full time و زي ما قولنا ساعات المدرسة ٦ ساعات من ٩ ل ٣ طيب لو ساعات شغلك أطول من كده في كذا حل:
1️⃣ أفضل حل تشتركي لأطفالك ف breakfast club و Afterschool club بيكونوا ف المدرسة نفسها
البريكفست بيبدأ حوالي الساعة ٨ أو ٨ إلا ربع بيختلف من مدرسة ل التانية وفي مدارس قليلة بيبدأ من ٧ ونص كمان.
والأفتر سكول بيكمل بعد المدرسة لحد ٥ ونص أو ٦ حسب المدرسة برضه.
بيكون اشتراكهم بسيط مش غالي وشامل snacks وبيعملوا أنشطة مختلفة كل يوم.
الأسعار في ليڤربول مثلاً ال breakfast club حوالي ٢ أو ٣ باوند ل الطفل في اليوم وال Afterschool club حوالي من ٦ ل ٩ باوند ( السعر بيختلف اختلاف بسيط حسب المدرسة ) ممكن مدن تانية تكون أغلى 🤷🏻♀️
بس للأسف مش كل المدارس بيعملوا ال clubs دي.
طب ف اجازات المدارس بقى ؟
الحل الأمثل هو ال Holiday Club
ده بيكون طول النهار من ٨ الصبح مثلاً ل ٥ ونص أو ٦ مساءً بيكون فيه أنشطة مختلفة وغالباً لازم تبعتي معاهم Lunch box ماشوفتش ولا واحد بيوفر lunch بصراحه، في بعضهم بيوفروا سناكس الصبح وآخر النهار وفي بعضهم لازم تبعتي السناكس كمان معاهم.
أسعارهم في ليڤربول مثلاً مش أقل من 16£ للطفل في اليوم والشائع 20£ - 25£
2️⃣ تاني حل Childminder و دول بيبقوا registered وليهم تقارير inspection على موقع ال ofsted زي المدارس ، بيكون عندهم مكان مخصص ومجهز لاستقبال الأطفال وبعضهم كمان بيوصلوا الأطفال من وإلى المدرسة وبيعملولهم سناكس برضه و دول حل كويس لو المدرسة مفيهاش clubs. كمان ممكن ياخدوا الأطفال يمشوهم بره شويه يروحوا بارك قريبة مثلاً.
مواعيدهم نفس ال clubs برضه بيبدأوا من ٨ أو ٧ ونص وبيخلصوا ٥ ونص أو ٦ ونص أقصى حاجة وأسعارهم بتكون أغلى من ال clubs بتاع المدرسة الساعة ل الطفل حوالي ٥ أو ٦ باوند.
ممكن كمان يستقبلوا الأطفال اللي سنهم صغير مش بيروحوا المدرسة لسه ( زي الحضانة كده يعني ) بيكون سعر اليوم الواحد حوالي ٤٠ ل ٦٠ باوند ده ف ليڤربول لكن ف مدن تانية ممكن يكون أغلى !
في بعضهم كمان بيشتغلوا ف اجازات المدارس زي ال holiday club بس طبعاً أغلى.
3️⃣ تالت حل Babysitter
و دي حل كويس لو بتخلصي شغلك متأخر يعني لو عندك نبطشيات زي حالاتي كده وبتخلصي ٨ أو ٩ بالليل أو لو بتبدأي شغل بدري أوي ٧ ونص الصبح مثلاً.
البيبي سيتر ممكن توصلك الأولاد المدرسة أو ال breakfast club بتاع المدرسة و تجيبهم من ال afterschool club وتروحهم البيت، تحضرلهم الأكل، تعمل معاهم الهوم ورك، تحميهم وتنيمهم زي ما تطلبي منها وتتفقي معاها هتعمل.
أسعارهم طبعاً أغلى لانها بتجيلك البيت و بتقعد بطفلك لوحده بتبدأ من ١٠ ل ١٥ باوند ف الساعة. لو طفلين بيبقوا نفس سعر الساعة هم الاتنين مع بعض لو أكتر من ٣ أطفال ممكن يبقى أغلى شويه.
نختارهم بناءً على ايه ؟ أو ازاي نطمنلهم يعني ؟
البيبي سيترز غالباً بيكونوا طلبه ف الجامعة وفي بعضهم بيكون شغال ف نيرسري أو مدرسة.
بنطلب نشوف اثبات شخصية يعني باسبور أو حاجة زي كده وممكن تحتفظي بصوره منه والأفضل يكون معاهم DBS اللي هو زي الفيش والتشبيه كده ويفضل برضه يكون معاهم First Aid Training عشان لو حصل أي طوارئ لاقدر الله. لو محتاجاها توصل الأولاد والمسافة بعيدة يفضل يكون معاها عربية وبتسوق. لو عندك أطفال Special Needs يفضل يكون عندها خبرة معاهم. وممكن نطلب منها reference من عائلات اشتغلت معاهم قبل كده بس لو عندها reviews ع الأبلكيشن يبقى مش هنحتاج ريفرنس.
طيب نلاقيهم فين دول بقى ؟ 🤔
في أبلكيشنز ليهم أشهرهم
أبلكيشن Bubble وأبلكيشن Childcare
أنا جربتهم الاتنين وهقولكم بالتفصيل نظام كل واحد فيهم.
🧸 أبلكيشن Bubble
في خدمات كتير ممكن تحجزوها من خلال الأبلكيشن ده
أهم ميزة ف الأبلكيشن ده هو التأمين أي sit بتحجزوها من خلاله بتكون متأمنه لحد مليون باوند !
بتدفعوا ٣ أنواع من الرسوم
💷 أول حاجة طبعاً رسوم البيبي سيتر نفسها هتلاقوا كل واحده كاتبه على بروفيلها بتاخد كم ف الساعة وحسب عدد الساعات اللي عايزينها بتضربوا ده ف ده
💷 تاني حاجة رسوم حجز booking fee بياخدها الأبلكيشن نفسه بتكون 1.99£
💷 تالت حاجة رسوم تأمين Trust & Safety fee بتكون 10% من رسوم البيبي سيتر الكليه.
الأبلكيشن فيه اشتراك اسمه bubble plus مميزات الاشتراك
✅ انه مش بياخد booking fee
✅ وبيقلل ال Trust & Safety fee ل النص ف بتبقى 5% بس.
✅ بيلغي كمان رسوم ال cancellation يعني لو هتلغي ال sit قبلها بكم ساعه بس مش بيطلب منك رسوم الغاء بس بيطلب منك تدفع جزء من تمن ال sit للبيبي سيتر كتعويض ليها يعني
✅ كمان خدمة ال Regular help و ال Night nanny متاحه بس من خلال الاشتراك
ميزة مهمة جداً ف الأبلكيشن ده وهي اللي بتخليني أفضله عن أي واحد تاني إن اللي شغالين ف ال NHS بياخدوا اشتراك bubble plus مجاني بتحتاجوا تسجلوا بايميل ال NHS بتاعكم بس. و ممكن تطلبوا NHS Volunteer يعني حد يعملكم اللي انتو عايزينه ببلاش عشان انتو شغالين ف ال NHS ! طب هم بيستفادوا ايه ؟ غالباً بيكونوا ناس لسه جداد ف الأبلكيشن ومحدش عملهم ريڤيو لسه ف ممكن يجوا ببلاش عشان تعمليلهم ريڤيو ع الأبلكيشن ويزودوا فرصتهم إن حد يحجزهم بعد كده.
طيب اللي معندوش NHS ايميل هيضطر يدفع الشهر تقريباً ب ١٠ باوند ، ال ٣ شهور ب 25£ ، وال ٦ شهور ب 40£
معايا كمان كود خصم لو استخدمتوه هتاخدوا ١٠ باوند خصم على أول حجز
Use code: GHTQX to get £10 off your first sit. Download it here: https://bubble.onelink.me/nnib/bubble
🧸 أبلكيشن Childcare
ده أشهر شويه من bubble لأن بلاقي عليه بيبي سيترز أكتر منه بتدوري ف منطقتك ع الناس اللي حواليكي وتشوفي بروفيلهم مؤهلاتهم وخبراتهم والأوقات المتاحين فيها ، بس عشان تتواصلي معاهم لازم حد فيكم يكون عامل اشتراك انتي أو البيبي سيتر أو ال تشيلد ميندر اللي عايزه تكلميها
الاشتراك بحوالي 16£ في الاسبوعين أو 26£ في الشهر
في مزايا كتير للاشتراك هتلاقوها بالتفصيل في اللينك ده
لو عملتوا اشتراك ابعتوا رسايل لكل الناس اللي ممكن تكون مناسبه قبل الاشتراك ما يخلص مثلاً Hi are you available أو حاجة زي كده لأن مجرد ما تبعتي رسالة واحدة لأي حد هتقدري تتواصلي معاهم بعد كده عادي حتى بعد ما الاشتراك بتاعك يخلص.
ده لينك الأبلكيشن
🧸 أبلكيشن Babysits
ده شبه تشيلد كير برضه بتقدروا تشوفوا البروفيل بتاع البيبي سيترز ومؤهلاتهم والمواعيد المتاحين فيها وأسعارهم كم ف الساعة بس عشان تقدروا تتواصلوا معاهم لازم تدفعوا الرسوم اللي هي تقريباً 25£ في الشهر.
ده لينك الأبلكيشن
4️⃣ رابع حل هو ال Au Pair
أنا شخصياً ماجربتهمش بس سمعت من ناس كتير جربوهم و مابينصحوش بالحل ده إلا طبعاً لو مضطرين جداً ومفيش حل قدامكم غيره
ايه هي ال au pair بقى ؟ 🤔
هي واحده من بلد تانية بتيجي تقيم عندك ف البيت
طبعاً بتحتاج غرفة ليها ومش بتدفع ايجار وبتاخد pocket money غالباً أقل من ١٠٠ باوند في الاسبوع.
بتتفقي معاها على كل الخدمات اللي عيزاها منها بالتفصيل يعني مثلاً هتاخد بالها من الأولاد في البيت ، هتوصلهم مدارسهم وتمارينهم و توديهم البارك مثلاً ، تعملهم سناكس ، ترتب غرفهم أو هتساعد في شغل البيت اليومي ، وبتكتبوا عقد بالكلام ده طبعاً بتكونوا انتو الاتنين ملزمين بشروط العقد يعني لو بعد ماجت ماعجبتكيش مش هينفع تمشيها قبل ما العقد يخلص غالباً بيكون العقد من ٣ شهور ل سنه مثلاً. كمان بتكتبوا في العقد الحد الأقصى للساعات اللي هتشتغلها في اليوم يعني بيكون ليها ساعات في اليوم لنفسها مش مطلوب منها تعمل حاجة، غالباً بيشتغلوا ٣٠ ساعة في الاسبوع.
معظمهم بيبقى هدفهم تبادل الثقافات وانهم يتعلموا لغة الأسرة اللي مستضيفاهم وأنتم كمان ممكن تتعلموا لغتهم وتعرفوا عن ثقافتهم.
هتلاقوهم على موقع AuPairWorld
5️⃣ الحل الخامس ال Nanny
و دول بينقسموا ل live-out-nanny
و live-in-nanny
ال live-out-nanny هي تقريباً نفسها البيبي سيتر
المصطلحين في انجلترا قريبين من بعض جداً و دايماً بيستخدموا interchangeably بس الفرق إن ال Nanny بتكون بروفيشنال أكتر وغالباً بيكون معاها qualifications ليها علاقة برعاية الأطفال وبتشتغل معاكي بصفة منتظمة إلى حد ما يعني يومين ف الاسبوع مثلاً و ممكن تساعدك ف شغل البيت كمان مش بس مع الأطفال.
وهتلاقوهم على نفس الأبلكيشنز اللي قولتها فوق بتاع البيبي سيترز.
و ال live-in-nanny قريبة جداً من ال au pair بس الفرق إنها بتكون في نفس البلد اللي انتي فيها عادي مش بتيجي من بلد تانيه زي ال au pair وبتوفريلها أكل و غرفة في البيت برضه بس مش بتاخد مصروف بقى لا بتاخد مرتب وطبعاً لازم يبقى أعلى من الحد الأدنى للأجور وبيبقى ليها اجازات مدفوعة زي الموظفين كده ف طبعاً بتكلف أكتر من ال au pair بكتير.
الميزة انها ممكن تاخد بالها من أطفال صغيرين أو رضع لأن زي ما قولنا بيكون عندها خبرة و دراسه في المجال بعكس ال au pair اللي غالباً بيكون سنهم صغير و بياخدوا بالهم من الأطفال الأكبر من ٣ سنين مثلاً. كمان بيساعدوا في شغل البيت أكتر من ال au pair.
بيكون ليهم agencies بتوظفهم بتتواصلي معاهم وتقوليلهم طلباتك ويشوفولك واحده مناسبه.
لو عندكم تجارب مع ال childcare ياريت تشاركوها معانا
و لو عندكم أي أسئلة اكتبولي في التعليقات 👇🏽
وياريت لو استفدتوا أي حاجة من البوست تتفاعلوا بريأكشن أو كومنت 👍🏼✍🏼
Comments