Nextdoor 🏘
- Rahma Mahdy Agha
- Jan 9, 2021
- 2 min read
Nextdoor
أبلكيشن الجيران
الأبلكيشن ده بتسجل فيه بعنوانك هيوصّلك بمنطقة سكنك عشان تتواصل مع جيرانك اللي ساكنين في نفس المنطقة. فيه أقسام كتير مفيدة جداً.
فيه قسم help map ده لو عايز تعرض مساعدتك لمنطقة معينة حواليك تساعدهم مثلاً في الشوبينج لو هم معزولين ومحتاجين حاجات ضروري زي أكل أو دوا أو حتى تطمن عليهم بالتليفون بس أو تمشيلهم الكلب بتاعهم. كمان لو انت محتاج أي حاجة ممكن تلاقي حد حواليك يعملهالك هتلاقي ع الخريطة نقط خضرا كده هتضغط عليها هتعرف اسم الشخص وايه الخدمة اللي هو عارضها بالظبط لو محتاج الخدمة دي ممكن تتواصل معاه بالرسايل.
في قسم في الأبلكيشن للبيزنس ممكن تلاقي فيه أي خدمات محتاجها زي مثلاً سباك، نجار، بيبي سيتر، حد يصلحلك عربيتك وخدمات تانية كتير. وممكن كمان لو انت عندك بيزنس تعرض خدماتك ع الأبلكيشن واللي محتاجها يتواصل معاك.
في كمان قسم safety ده هتلاقي في بوستات من جيرانك اللي اتعرضوا لأي موقف سرقة مثلاً أو حد هاجمهم أو كده بيقولوا المكان بالظبط وبيوصفوا الشخص اللي عمل كده عشان الناس لو شافته تاخد حذرها منه.
في كمان قسم Lost & Found لو أي حاجة ضاعت منك في المنطقة أو لقيت حاجة واقعة ف الشارع ممكن تعمل بوست في القسم ده.
ممكن كمان تبيع أو تشتري من عليه أي حاجة مستعملة في منطقتك وممكن كمان تلاقي جيرانك عارضين حاجات مش محتاجينها ببلاش في قسم For Sale & Free.
في كمان قسم للجروبات للجيران اللي عندهم أي اهتمامات مشتركة زي مثلاً جروب خاص بهواية معينة بتشوف مين حواليك عنده نفس الهواية وتتواصل معاهم أو جروب للناس اللي بيعانوا من مرض معين أو جروب للكلاب والقطط المفقودة وطبعاً ممكن أي حد ع الأبلكيشن يعمل جروب.
كمان تقدر تعرف جيرانك اللي موجودين ع الأبلكيشن من قسم neighbors هيفتحلك الخريطة هتلاقي مربعات خضرا وحمرا . الخضرا دول جيرانك اللي مسجلين وموجودين ع الأبلكيشن بالفعل والحمرا دول اللي مش مسجلين ودول ممكن تعملهم invite والأبلكيشن هيبعتلهم جواب invitation ف البريد لو حابين يشتركوا. أنا شخصياً عرفت الأبلكيشن ده عن طريق جواب وصلي ف البريد من أحد جيراني.
وفيه خدمات تانية كمان...
وممكن تعمل subscribe بالايميل وهيبعتولك آخر الأخبار .
أبلكيشن رائع بصراحه أنصحكم تشتركوا فيه وتدعوا جيرانكم. خصوصاً في ظروف الكورونا واللوك داون اللي احنا فيه ده ممكن يساعد ناس محتاجة فعلاً.
⬅️ ملحوظة: الأبلكيشن مجاني تماماً وأعتقد إنه متاح في ال UK فقط.
ده لينك الآب
Comments