Duolingo
- Rahma Mahdy Agha
- May 29, 2022
- 4 min read
اللي عايز يتعلم لغة جديدة ومش عارف يبدأ منين
في أبلكيشن اسمه Duolingo ممكن يساعدكم تبدأوا تتعلموا أكتر من ٤٠ لغة متوفرين عليه.
- بيساعدك تتعلم مفردات اللغة والجرامر والنطق عن طريق دروس صغيرة بيكون فيها تمارين كتابة و قراءة. يعني مثلاً يجيبلك جملة مكتوبة وتترجمها، أو تقرأها ويقيم نطقك، أو جملة تسمعها وتكتبها، أو توصيل الكلمات ومعانيها. وفي بعض اللغات في جزء قصص قصيرة أو محادثات وتكمل الفراغات الناقصة فيها. في بعض اللغات برضه فيها audio lessons دروس تسمعها عشان تتعلم النطق الصح. كمان بيخليك تراجع الدروس اللي انت عملت فيها أخطاء لحد ما تعملها صح.
- بيسألك الأول انت هتبدأ من الصفر ولا تعرف شويه في اللغة دي لو تعرف شويه هيعملك اختبار سريع لتحديد المستوى اللي هتبدأ منه.
- المنهج متقسم وحدات وكل وحدة فيها مجموعة مواضيع كل موضوع فيه عدة مستويات كل مستوى فيه مجموعة دروس لما بتخلص مستوى بتاخد تاج وكل موضوع فيه ٦ تيجان crowns لما تخلصهم كلهم تبقى كده قفلت الموضوع ده. محتاج ع الأقل تاخد تاج واحد عشان يفتحلك الموضوع اللي بعده. في كل موضوع هتلاقي Tips عبارة عن شرح بسيط للقاعدة اللي عليها أسئلة الدروس اللي فيه.
📌 مميزات الابلكيشن:
- انه بيعلمك الكلمات في سياق الكلام يعني بتعرف ازاي تستخدم الكلمة في محادثة مش مجرد كلمات ومعانيها وخلاص.
- كمان الأبلكيشن بيفكرك كل يوم تعمل درس عشان بيبعتلك notifications ولما تستمر بيحسبلك عدد أيام ال streak أو الحماسة يعني بقالك كم يوم بتعمل درس كل يوم وده بيحفزك تستمر لما تلاقي نفسك كملت ١٠٠ يوم مثلاً وهتبقى مبسوط اوي لما تكمل سنة كاملة بتعمل درس ع الأقل كل يوم.
- في كمان competitions كتير في الأبلكيشن وبتنافس متعلمين كتير من دول مختلفة وممكن كمان تضيف أصحابك وتشجعوا بعض. وكل اسبوع بيعمل تقييم اللي جاب سكور أعلى بيطلع ل ال League أو المستوى الأعلى. وكل درس بتخلصه بتاخد بوينتس. ولما بتخلص التحديات بتاخد جواهر تقدر تشتري بيها حاجات تانية في الأبلكيشن.
- كل الحاجات دي بتخليك تحس انه fun بتتعلم بطريقة مسلية كإنه لعبة.
- وممكن تتعلم أكتر من لغة في نفس الوقت. وبتختار تتعلم اللغة كمتحدث بالعربية أو الانجليزية يعني مثلاً ممكن تتعلم انجليزي - عربي وف نفس الوقت أسباني - انجليزي.
- المحتوى مناسب للأطفال كمان ممكن تشجعوا أولادكم يستخدموه عشان يتعلموا لغة جديدة.
- محتوى الأبلكيشن مجاني تماماً بتقدر تستخدم كل المحتوى بدون ماتدفع ولا مليم بتعمل أكونت فقط وتستخدمه فوراً بس بيكون ليك 5 Hearts يعني ٥ غلطات لو غلطتهم كلهم لازم تستنى لما تشحن ال heart كل واحد بياخد ٥ ساعات ويرجع تاني لوحده يعني ٢٥ ساعه عشان يرجعوا كاملين أو ممكن يقولك اسمع اعلان وخد heart او اعمل اختبار سريع وخد heart.
في اشتراك بفلوس اسمه Super Duolingo ميزته انه بيديك unlimited hearts يعني اغلط براحتك وكمل عادي مش مضطر تستنى خمس ساعات، ومفيش اعلانات، وكمان لو في مستوى عملت أول درسين صح بدون ولا غلطه ممكن تتنقل المستوى اللي بعده على طول لو عايز لو مش عايز ممكن تكمل كل الدروس عادي براحتك، كمان بيحافظ على ال streak لو نسيت تعمل درس آخر يومين، بس بعد يومين مش بيقدر يحافظ عليها، كمان بيعملك Quiz خاصه بيك في الدروس اللي انت غلطت فيها عشان تحسن مستواك.
مؤخراً عملوا نوع جديد من الاشتراك اسمه Family plan ده اشتراك سنوي يقدر يشترك فيه لحد ٦ أشخاص ب ٩٠ باوند استرليني في السنة يعني الشخص الواحد ب ١٥ باوند في السنة كلها ، المشترك الرئيسي هو اللي بيدفع وهو اللي بيقدر يضيف أو يحذف باقي المشتركين. لكن لو شخص هيشترك لوحده بيكون الاشتراك ٦٠ باوند في السنة وفي اشتراك شهري ١٠ باوند في الشهر طبعاً فرق شاسع بينه وبين العائلي ف اللي حابب يشترك يعمل العائلي أفضل ويشجع ٥ من أصحابه يدخلوا معاه.
📌 عيوب الأبلكيشن من وجهة نظري
- إنه مش مناسب اوي لاحتراف اللغة هو اه بيساعدك تتعلم وكل حاجة لكن لوحده مش كفاية عشان تعدي امتحان بروفيشنال في اللغة مثلاً لكن ممكن يساعدك في المحادثات اليومية خصوصاً لو بتتفرج معاه على ڤيديوهات يوتيوب مثلاً.
- لازم تتعلم المواضيع بالترتيب اللي ف الأبلكيشن يعني لو عايز تتعلم موضوع معين لازم تخلص المواضيع اللي فوقه كلها الأول لأن كل موضوع بتخلصه بيفتحلك اللي بعده.
- أحياناً كتير الجمل اللي في التمارين مابيكونش ليها معنى It doesn’t make sense يعني مثلاً يقولك ترجم The elephant is pink ف هتقول الفيل وردي و دي حاجة مالهاش معنى طبعاً مفيش فيل لونه وردي لكن هو هدفه انك تعرف معنى كلمة فيل ومعنى كلمة وردي وتكوّن الجملة صح بغض النظر عن انك ممكن تستخدم الجملة دي ف حياتك أصلاً ولا لأ.
- التقييم الصوتي بتاعه مش دقيق خالص يعني لو قلت نفس الأصوات اللي في الجملة بأي ترتيب بيحسبه صح.
💥 برغم عيوبه أنا شايفه إنه مفيد جداً خصوصاً في اللغات التانيه (غير الانجلش) أنصحكم تستخدموه الأول مجاناً لأن المحتوى بالكامل مجاني تماماً و هم بعد فترة هيبعتولك offer انك ممكن تجرب super duolingo لمدة اسبوعين مجاناً وبعد الاسبوعين لو عايز تكمل بتدفع ف بتكون فرصة حلوة انك تشوف هل هيفرق معاك فعلاً مميزات الاشتراك ولا لأ. عموماً أنصحكم ماتعملوش الاشتراك إلا لما تلاقوا نفسكم ملتزمين فترة الأول يعني مش أقل من كم شهر وبعدين لو لاقيتوا نفسكم محتاجين مميزات الاشتراك ممكن تعملوا الاشتراك العائلي أرخص حاجة.
- الأبلكيشن حالياً عليه أكتر من ٥٠٠ مليون مستخدم في العالم منهم أكتر من ٤٠ مليون Monthly Active Users وحوالي ٣ مليون مشترك في سوبر دولينجو. و مصنف كواحد من أفضل الأبلكيشنز التعليمية في العالم.
- ممكن تنزلوا الأبلكيشن من اللينك ده
Comments