Pharmacy First 💊
- Rahma Mahdy Agha
- Apr 20, 2024
- 2 min read
في خدمة جديدة عملتها ال NHS عشان يقللوا الضغط شويه على عيادات ال GP اسمها
Pharmacy First (clinical pathways)
بدأ العمل بيها من يناير ٢٠٢٤ ، الخدمة دي بتدي صلاحية للصيادلة انهم يكتبوا روشتات مش بس يصرفوها لكن لحالات معينة وأعمار محددة.
من الحالات اللي ممكن الصيدلي يكتبلك مضاد حيوي ليها (أو أي أدوية prescription only) : التهاب الجيوب الأنفية و المسالك البولية والأنف والأذن والحلق.
الحالات كلها و الأعمار اللي مسموحلهم يتعاملوا معاها بدون الرجوع لأي طبيب في الجدول ده 👇🏽
طبعاً دي خدمة كويسه جداً لانك مش مضطر تكلم الجي بي أصلاً لو عندك حاجة من الحالات دي بتروح الصيدلية على طول وتملى فورم هتلاقي فيها أسامي ال ٩ حالات دول
Sinusitis
Water infection
Eye
Ear
Sore throat
Insect bite
Shingles
Impetigo
Emergency contraception
هتعلم على الحاجة اللي محتاجاها والصيدلي هيدخلك غرفة الاستشارة اللي ف الصيدلية هيملى فورم على السيستم وهيسألك شويه أسئلة عن الأعراض وكده وبعدين لو حالتك وأعراضك ماشيه مع دواعي استعمال الأدوية اللي مسموحلهم يكتبوها، هيكتبهولك ويصرفهولك خلال دقايق حتى لو مضاد حيوي.
طبعاً لو الأعراض فيها أي حاجة red flag غالباً مش هيقدر يكتب روشته وهيحولك لمتخصص تاني.
أنا شخصياً استخدمت الخدمة دي، مكنتش أعرفها أصلاً وكنت رايحه الصيدلية اسأل على أي دوا مش محتاج روشته يعني، بعدين ادوني الفورم مليتها والصيدلي عملي الاستشارة على السيستم وكتبلي مضاد حيوي وصرفهولي، الموضوع كله ماكملش نص ساعه تقريباً وكنت منبهره جداً بصراحه 😂
لو حد ف المجال الطبي وحابب يعرف ال Clinical Pathways لكل حاله هتلاقوها ف اللينك ده
أنا حابه أفكركم بس إن مش دايماً المضاد الحيوي بيكون هو الحل حتى ف الحالات ال ٧ دول وهيكتبوه لو أنتم فعلاً محتاجينه بس الميزة ف الخدمة دي هي تقليل الانتظار الطويل لمواعيد ال GP دا لو عرفنا ناخد معاد أصلاً !!
حابه برضه أفكركم إن في حالات أكتر بكتير ممكن الصيدلي يساعدكم فيها وينصحكم بأدوية ليها (مش محتاجه روشته أصلاً ) زي أعراض البرد بما فيها القروح حول الفم والكحه والحساسية والامساك والاسهال وعسر الهضم والفطريات وبعض الأمراض الجلدية وغيرهم كتير.
ف دايماً فكروا تستشيروا صيدلي الأول للأعراض البسيطه (اللي مش طوارئ يعني) عشان توفروا على نفسكم انتظار مواعيد الكشف.
أدام الله عليكم لباس الصحة والعافية 🤍
Comments