Marriage Allowance explained

ال marriage allowance ممكن يقلل الضرايب اللي بتدفعوها في السنة شويه.

كل واحد له personal allowance ده مبلغ الدخل اللي معفي من الضرائب (وعلى فكرة زاد السنة دي بقى 12,570£ ده طبعاً دخل الموظفين مش التجار ولا اللي بيأجروا أملاكهم).

لو في اتنين متجوزين أو في civil relationship وفي واحد فيهم بيدفع ضرايب والتاني مش بيدفع (سواء كان مش بيشتغل خالص أو بيشتغل بس مرتبه قليل)، الشخص اللي مش بيدفع ضرايب ممكن يشارك جزء من ال personal allowance بتاعه مع زوجه/زوجته عشان هم الاتنين في الآخر يدفعوا ضرايب أقل. المبلغ اللي ممكن ينقله ده هو 1,260£ مش أكتر ولا أقل يعني حوالي ١٠٪؜ من ال personal allowance. و ده ممكن يقلل الضرايب اللي هتدفعها السنة دي 2021/22 بحد أقصى 252 باوند في السنة.

- ممكن كمان تعملوه بأثر رجعي لمدة ٤ سنين فاتوا.

السنين اللي فاتت الحد الأقصى للتوفير كان أقل شويه

* 2020/21 – £250

* 2019/20 – £250

* 2018/19 – £238

* 2017/18 – £230

يعني لو عملت claim للأربع سنين اللي فاتوا (بالحد الأقصى) هيرجعولك 968£ بالإضافة لل 252£ بتوع السنة دي يعني 1,220£

وخلوا بالكم السنة المالية بتبدأ ٥ ابريل يعني لو عايزين تعملوا claim ل سنة 2017/18 لازم تعملوه قبل 05/04/2022 .

حتى لو أحد الزوجين اتوفى خلال الأربع سنين اللي فاتوا ممكن تعملوه بأثر رجعي برضه.

- شرط التقديم ع ال marriage allowance إن لازم أحد الزوجين يكون مابيدفعش ضرايب والتاني بيدفع ،

والشخص اللي بيدفع ضرايب يكون basic level Income Tax يعني على الشريحة الأولى من الضرايب اللي هم بيدفعوا ٢٠٪؜ ضرايب يعني يكون مرتبه السنوي مش أكتر من 50,270£ في انجلترا أو 43,662£ في اسكتلندا.

- مثال للتوضيح:

محمد وهند متجوزين

محمد بيشتغل وبيقبض ٣٠ ألف وهند بتشتغل وبتقبض ١٠ آلاف

محمد عنده 12,570£ معفيين من الضرايب وبيدفع ضرايب على باقي المرتب اللي هو 17,430£ قيمة الضرايب اللي بيدفعها 3,486£

هند مابتدفعش ضرايب لأن دخلها عشر آلاف بس ف باقي معاها 2,570£ من ال 12,570£ المعفيين من الضرايب. هتنقل من ال 2,570£ اللي باقيين معاها 1,260£ لمحمد ف محمد هيبقى عنده 13,830£ معفيين من الضرايب وهيدفع ع الباقي اللي هو 16,170£ قيمة الضرايب اللي هيدفعها 3,234£

يبقى كده محمد وهند وفروا 252£

خلوا بالكم إن في سيناريوهات ممكن تخسروا فيها لو أحد الزوجين دخله يادوب أقل من ال personal allowance والتاني يادوب أعلى حاجة بسيطة يعني بيدفع ضرايب قليلة اوي ف احسبوها كويس قبل ما تقدموا.

- بمجرد ما تقدم عليه هيفضل يتنقل المبلغ اتوماتيك كل سنه من ال personal allowance بتاعك لحد ما تكنسل. لو ظروفك اتغيرت وبقى مش من حقك (لو مرتبك زاد مثلاً واتنقلت لشريحة الضرايب الأعلى أو حصل طلاق) لازم تكنسل.

- القانون ده معمول بيه من ٢٠١٥ وأي حد يقدر يسجل مع ال HMRC وهم هيغيروا التاكس كود بتاعه. هتحتاج ال National Insurance Number و ID .

التسجيل من خلال اللينك ده https://www.gov.uk/apply-marriage-allowance

#انجلترا_وسنينها