نصائح ايجار البيوت في انجلترا 🇬🇧
- Rahma Mahdy Agha
- Oct 10, 2021
- 5 min read
Updated: Dec 27, 2022
نصائح ايجار البيوت في انجلترا :
١- الأفضل تأجر البيت لمدة صغيرة الأول وبعدين لو عجبك البيت والمنطقة وهتستقر في شغلك ممكن تجدد العقد ب سنه أو سنتين حسب الاتفاق مع المؤجر.
أحياناً بيبقى مش متاح ايجار مدة صغيرة في الحالة دي الأفضل تتأكد إن في break clause في العقد. غالباً بتبقى في نص المدة يعني لو العقد سنه ال break clause هيكون ٦ شهور و ده بيدي الحق للطرفين إنهم يفسخوا العقد بعد المدة دي لكن بشروط بتكون موجودة في العقد برضه زي مثلاً إنك تدي notice قبلها بشهر مثلاً. و ده ميزته إن لو ما ارتحتش في البيت لأي سبب أو لو غيرت مكان شغلك ماتضطرش تستنى مدة العقد كامل أو تخسر ال deposit عشان تمشي. بس خلي بالك إن ده للطرفين يعني المستأجر وكمان صاحب البيت أو ال agency يقدروا يفسخوا العقد بعد مدة ال break clause.
٢- اعمل check على ال council tax band عشان تعرف هتدفع كونسيل تاكس قد ايه كل شهر.
ال Council Tax اللي هي ضريبة البلدية اللي بندفعها كل شهر دي بتكون حسب الباند اللي فيه البيت وبيتحدد الباند حسب سعر البيت كان كم سنه ١٩٩١ السنة اللي اخترعوا فيها سيستم الكونسيل تاكس ده
Band A أقل حاجة وBand H أعلى حاجة، ده في انجلترا وسكوتلاند لكن ويلز مختلفين شويه بيحسبوه على سنة ٢٠٠٣ وعندهم باند زياده Band I أعلى من H
ممكن تعملوا check من موقع الحكومة عشان تعرفوا الباند بتاع أي بيت هتدخلوا البوست كود وهيديك كل العنوانين ف البوست كود ده بالباند بتاعها وفي الجنب هتلاقي اسم الكونسيل اللي تبعه لو دخلت على موقع الكونسيل نفسه هتلاقي المبلغ اللي كل باند بيدفعه ، على سبيل المثال في ليڤربول مثلاً باند A بيدفع حوالي ألف ونص ف السنه وباند H زيادة عن أربع آلاف ف السنه
وانت بتأجر المفروض بيتكتب في الاعلان الباند بتاع البيت لو مش مكتوب تقدر تشوف من اللينك ده
٣- اعرف معدل الجريمة في المنطقة من خلال الموقع ده https://crimerate.co.uk/
هتلاقوا ع الموقع معدل الجريمة في مقاطعات ال UK كلها ولو ضغطوا على اسم معين هتلاقوا معدل الجريمة في المدن اللي ف المقاطعة دي تحديداً وكل مدينة ممكن تعرفوا كمان معدل الجريمة في أحياءها المختلفة ونوع الجرايم دي ايه.
٤- اعرف استهلاك البيت للطاقة سواء كهرباء أو غاز من خلال Energy Performance Certificate بيبقى عبارة عن rating من A ل G الأفضل يكون A ومش أقل من C. أفضل استهلاك اللي هو A مش بيستهلك طاقة كتير بالتالي هتدفع فواتير أقل ، ال rating ده بيدينا فكرة عن العزل بتاع البيت يعنى لو البيت مش معزول كويس بيبقى بارد في الشتا وبتضطر تشغل الدفايات فترات أطول وبالتالى فواتير أعلى. وطبعاً بعد ما تنقل في البيت لك كامل الحق إنك تغير شركة الطاقة لو مش عجباك.
٥- اتأكد إن التدفئة مركزية central heating والأفضل تكون غاز مش كهرباء.
٦- اتأكد إن مفيش عفن mould
العفن بيبقى عبارة عن بقع سودا بتكون في أركان الجدران أو الشبابيك أو في السقف، أكتر مكان بيبقى موجود فيه الحمام خصوصاً عند الأحواض والبانيو. مشكلته إنه لو موجود بكميات كبيرة ممكن يسبب مشاكل في الجهاز التنفسي خصوصاً لمرضى الحساسية أو اللي مناعتهم ضعيفة.
للأسف ممكن مانعرفش نتأكد من وجود العفن لو البيت لسه مدهون جديد.
هو سببه غالباً الرطوبة العالية وقلة الشمس والتهوية
وممكن حتى بعد ما نأجر يظهر بقع بسيطة نقدر نستخدملها منتجات ال anti-mould موجودة في كل السوبرماركتس الكبيرة ونحاول نقلل الرطوبة في البيت ممكن نستخدم جهاز dehumidifier ونفتح الشبابيك لو الجو يسمح خصوصاً شباك الحمام بعد الشاور ونشغل مروحة الextractor في الحمام لو موجودة ونسيب الباب مفتوح لغاية ما الحمام يكون مافيهوش بخار خالص.
٧- لو البيت مفروش لازم نعمل check على كل حاجة وأي حاجة ف البيت الأجهزة نفتحها ونشغلها ونبص كويس جواها ولو في أي عيب بسيط أو حتى خدش أو حفر أو مسمار ف أي جدار لازم نصوره ونبعت لل agency أو ال landlord عشان لما تيجي تسيب البيت هيقارنوا الصور دي ب الوضع اللي هتسلم عليه البيت هم كده كده بيبعتولك property's inventory فيه حالة الشقة أو البيت بالتفصيل والصور ، المفروض تراجعوه كويس جداً وأي حاجة فيها مشكلة صورتها مش موجودة صوروها وابعتوها عشان يضيفوها على ال file ده عشان لما تيجوا تسيبيوا البيت بعد كده هيحاسبوكم بناءً عليه ولو في أي حاجة مش مظبوطة هيخصموا تمنها من ال deposit حتى لو كانت موجودة قبل ما تأجر مادام ماصورتهاش خلاص مفيش ما يثبت إن مش انت اللي عملتها. لو هم ما بعتوش inventory اطلبه منهم. ولازم كمان يكون في gas safety certificate.
٨- اتأكد ال deposit هيكون فين تبع أي scheme لأن مش صاحب البيت ولا ال agency هم اللي المفروض يحتفظوا بيه Landlords are required by law to protect tenants’ deposits in a government-approved tenancy deposit protection scheme within 30 days
ولازم يبعتولك الإثبات خلال ٣٠ يوم من الدفع.
٩- الشبابيك والبيبان الازاز كلها تكون double glazed لأن ال single بتخلي البيت أبرد ف الدفايات هتستهلك أكتر ف بالتالي الفواتير هتبقى أعلى وكمان الازاز السنجل بيحصل تكثف بخار ميه عليه ف الرطوبة هتزيد وال mould كمان هيزيد.
١٠- الأفضل تكون حنفية الحمام خلاط مش سخن لوحده وبارد لوحده ونتأكد إن في دش في البانيو لأن بعض البيوت بيكون في حنفيات في البانيو بس مفيش دش وممكن تكون حنفية سخنه لوحدها وبارده لوحدها بدون خلاط كمان. نتأكد كمان إن الحمام فيه شباك وناخد بالنا إن أحياناً الحمام بيكون مفروش موكيت لازق ف الأرض مينفعش نشيله!!
١١- لو في أطفال في سن المدارس نتأكد إن في مدارس كويسه في المنطقة.
١٢- لو مفيش عربيه نشوف أقرب محطات باص أو قطر والمسافة للسيتي سنتر لأن غالباً بيكون في كل المحلات الكبيرة أو المسافة ل أكبر شوبينج بارك في المنطقة ومحلات الحلال والمسجد قريبين ولا لأ لو بتحتاجوهم.
١٣- لو في عربية مهم يكون في driveway أو جراچ لأن العربية لما بتتركن ف الشارع التأمين بتاعها بيبقى أغلى شويه.
١٤- اتأكد إن مكتوب في العقد إن أي تصليحات صاحب البيت أو ال agency يتكفل بتمنها.
١٥- شوف تغطية شبكات الموبيل وال broadband في المنطقة من ال broad band checker أحياناً بيكون في مناطق مفيهاش تغطيه من شركات معينه. في مواقع كتير تقدر تعمل check عليها بالبوست كود منها ده مثلاً https://www.cable.co.uk/broadband/check-my-area/
وممكن ترتب الشركات بالأسرع مثلاً أو الأرخص. وتقدر تغير شركة ال broadband بسهولة أو حتى شبكة الموبيل لو لقيت التغطية مش كويسة ف المنطقة اللي هتنقل فيها ممكن تغيرها.
١٦- نشوف هنحتاج ضامن ولا لأ. أحياناً لو مفيش دخل ثابت أو الدخل قليل بيشترطوا وجود ضامن أو تدفع ٦ شهور مقدم مثلاً.
١٧- الأفضل البيت يكون south-facing يعني باتجاه الجنوب عشان الشمس تدخل البيت ، هيبقى أدفى وكمان البيوت اللي بيدخلها شمس أكتر نسبة الرطوبة فيها بتكون أقل (ده لو الشمس طلعت أصلاً يعني). وكمان لو هتزرع نباتات في الجاردن هيكون أفضل لمعظم أنواع النباتات.
بنشوف اتجاه البيت ع google maps أو ممكن واحنا بنعمل معاينه نفتح البوصلة ع الموبيل ونشوف هو جهة الجنوب ولا لأ.
١٨- نشوف في أركان البيت لو في آثار أو فضلات فئران ونتأكد مفيش أي فتحات في المطبخ ع الباك يارد ممكن تدخل أي حشرات أو فئران، عموماً لو البيت قريب من حديقة غالباً هيكون فيه فيران.
١٩- لو مابتحبش الازعاج الأفضل ما تأجرش بيت على شارع رئيسي و زحمه هتسمع عربيات النقل الكبيرة وهي معديه وسارينة البوليس والاسعاف كل شويه.
٢٠- اقرأوا العقد كويس جداً اتأكدوا لو في شروط خاصه بال pets مثلاً أو لو ممنوع التدخين، ولو في أي شروط لفسخ العقد زي انك تشوف حد يأجر مكانك مثلاً أو تدفع رسوم معينه واسأل لو حصل مشكلة المفروض تكلم مين ال landlord ولا ال agency واسأل لو ممكن تغير حاجة في ديكور البيت زي انك تدهن الجدران مثلاً.
٢١- ماتأجروش بيت من غير معاينة بناءً على الصور اللي ف الإعلان، لازم تعاينوا البيت بنفسكم.
لو عندكم أي نصائح أخرى ياريت تشاركونا في التعليقات.
تقدروا تعرفوا أنواع المنازل في انجلترا والفرق بينها من البوست ده
Comments