الفرق بين الحلال 🕌 والكوشر 🕍

الفرق بين الكوشر والحلال ؟

أكيد لاحظتوا اللوجو بتاعهم على بعض المنتجات هنا في انجلترا.

في ناس كتير بيعتبروا إن أي أكل كوشر يبقى حلال، لكن ده مش صحيح تماماً؛ لأن الكوشر بيسمح بمعظم الكحوليات. وفي فروق تانية بين المصطلحين.

- الكوشر: هو طعام اليهود وأحكامه مُستمدّه من التلمود. والكلمة مشتقة من كلمة (كشروت) باللغة العبرية ومعناها الحرفي صالح أو صحيح ، وغير الكوشر اسمه (طريفه) ما يقابل كلمة (حرام) في الإسلام.

- الحلال: هو طعام المسلمين ومستمد القواعد بتاعته من القرآن الكريم.

أوجه الشبه بين الكوشر والحلال:

- هم الاتنين بيمنعوا الخنازير.

- هم الاتنين بيشترطوا ذبح الحيوان بطريقة معينة من الرقبة وذكر اسم الله عليه (الحيوان المذبوح حسب الشريعة الإسلامية اسمه ذبيحة، لكن اللي مذبوح بالطريقة اليهودية اسمه شحيطة).

- هم الاتنين بيمنعوا أكل الحيوانات الميتة.

أوجه الاختلاف بين الكوشر والحلال:

- الكوشر بيسمح ببعض الكحوليات على عكس الحلال بيمنعها تماماً.

- الكوشر بيمنع المحاريات والحيوانات البحرية اللي مالهاش قشور وزعانف الاتنين مع بعض، على عكس الحلال بيبيح كل الكائنات البحرية.

- الكوشر ممنوع تناول منتجات الألبان مع اللحوم ممنوع الخلط بينهم بأي شكل، لكن ده مسموح في الحلال عادي وحلال نضيف زبادي في تتبيل اللحم عادي.

- الكوشر بيمنعوا الثدييات غير المجترة واللي مالهاش حوافر مشقوقة، لكن الشرط ده مش موجود في الحلال. يعني حيوان زي الجمل مثلاً يعتبر حلال لكن مش كوشر لأن حوافره غير مشقوقة.

- الذبيحة الحلال كل أجزاءها يمكن تناولها لكن الشحيطة لأ في جزء من الشحم والعصب الوركي ممنوع أكله ولا يعتبر الجزء الخلفي من الحيوان كوشر لحد ما يعملوله عملية اسمها (نيقور) ويزيلوا الجزء اللي ممنوع أكله ده. وهي عملية معقدة ومكلفة وعادةً محدش بيعملها وبيعتبروا الجزء الخلفي ده مش كوشر وخلاص.

أهم حاجة في الكلام ده كله إن مش كل الكوشر حلال لأن ممكن يكون فيه كحول.

حبيت أوضح باقي الفروق برضه ممكن حد يستفيد منها. أنا واحدة من الناس احتجت المعلومات دي لما كنت بذاكر وقابلني سؤال لو مريض يهودي عندك ف المستشفى ولقيتي المطبخ جايبله صينية الغدا فيها شريحة لحم وكوب حليب هتعملي ايه ؟ الحقيقة أنا استغربت السؤال ومكنتش فاهمه فين المشكلة و ده اللي خلاني أبحث عن تفاصيل الكوشر دايت.

#انجلترا_وسنينها