Pumpkin Picking 🍁

من الأكتڤيتيز الجميلة اللي ممكن تعملوها مع الأولاد ف اجازة نص الترم بتاع شهر اكتوبر ال Pumpkin Picking 🎃

بتروحوا مزرعة وتجمعوا القرع أو اليقطين وتشتروه وانتو ماشيين.

طبعاً معظم الانجليز بيجيبوه عشان الهالوين بس حتى لو مش بنحتفل بالهالوين ممكن نجيبه وناكله عادي 😂

معظم المزارع بيكون الدخول مجاني أو مقابل رسوم بسيطة حوالي ٣ باوند للفرد مثلاً وطبعاً بتدفعوا تمن القرع اللي هتجمعوه احنا جبنا التلاته ب ١٠ باوند اللي حجمهم متوسط مش ضخم جداً ومش صغير.

وغالباً بيكون في أنشطة تانيه ف المزرعة أحياناً بيكونوا حاطين ألعاب للأطفال برسوم اضافية. وبيكون في كافيه.

والمزرعة اللي رحناها كانوا عاملين Tractor rides برسوم اضافية برضه ده جرار متوصل فيه زي اتوبيس كده بياخدكم لفه حوالين المزرعة كلها.

الأطفال بينبسطوا بالتجربة جداً وبيقضوا يوم لطيف مش مكلف خالص.

غالباً المزارع دي بيكونوا فاتحين ال pumpkin picking لحد آخر اكتوبر.

لو كتبتوا على جوجل pumpkin picking near me أو اسم المدينة بتاعتكم هيطلعلكم الأماكن القريبة منكم وريڤيوهات عنها.

وطبعاً ما ننساش نفكر أولادنا إن ثمرة القرع أو اليقطين دي ذكرت في القرآن مرة واحدة في سورة الصافات في قصة سيدنا يونس:

”فَالْتَقَمَهُ الْحُوتُ وَهُوَ مُلِيمٌ (142) فَلَوْلَا أَنَّهُ كَانَ مِنَ الْمُسَبِّحِينَ (143) لَلَبِثَ فِي بَطْنِهِ إِلَى يَوْمِ يُبْعَثُونَ (144) فَنَبَذْنَاهُ بِالْعَرَاءِ وَهُوَ سَقِيمٌ (145) وَأَنْبَتْنَا عَلَيْهِ شَجَرَةً مِنْ يَقْطِينٍ (146)”.

واليقطين له فوائد صحية كتيرة جداً ممكن تتكلموا فيها مع أولادكم برضه.

وبعد ما نشتريه بقى نطبخه مع الأولاد 👩🏻‍🍳🧑🏻‍🍳

في وصفات كتير جداً ممكن تتعمل بيه وممكن الاولاد يعملوها معاكم 🥣 هو ميزته كمان انه بينفع في الوصفات الحادقة والحلوة ونكهته مش قويه أوي سهل تضيعيها بشويه مكونات تانية لو مش بتحبوه يعني وعايزين تستفيدوا من قيمته الغذائية.

احنا مثلاً عملنا 1️⃣ شوربة قرع 2️⃣ ومتبل بالقرع 3️⃣ و بان كيك بالقرع  4️⃣ وطبعاً صينية القرع بالبشاميل المصرية الأصيلة 😋 الوصفات دي كلها عملناها بقرعايه واحده 😂 5️⃣ والقرعايه التانية حشيتها رز ولحمه وحطيتها ف الفرن طلعت طاجن تحفة ما شاء الله 😍

في وصفات كتير تانيه ممكن تتعمل بيه زي 6️⃣ كيكة أو 7️⃣ تشيز كيك أو 8️⃣ مهلبية أو 9️⃣ كاسات حلى طبقات أو 🔟 مربى و 1️⃣1️⃣ بيتعمل كمان صينية باللحمة المفرومة 1️⃣2️⃣ ولو عندك بيبي ممكن تسلقيه و تهرسيه وتأكليه بالمعلقة.

وانتو كمان لو جربتوا تروحوا pumpkin picking أو جربتوا وصفات قرع وعجبتكم ياريت تشاركوها معانا 🎃

#انجلترا_وسنينها