وفاة الملكة اليزابيث الثانية 👑

الاسبوع ده شهد حدثين مهمين جداً في تاريخ بريطانيا 🇬🇧

أولهم 1️⃣ تولي ليز تراس رئاسة الوزراء يوم ٦ سبتمبر لتصبح ثالث سيدة تتقلد هذا المنصب في تاريخ بريطانيا بعد مارجريت تاتشر وتريزا ماي.

2️⃣ وبعده بيومين بالظبط وفاة الملكة اليزابيث الثانية يوم ٨ سبتمبر ٢٠٢٢ التي ماتت عن عمر يناهز ٩٦ سنه. بعد ما حكمت بريطانيا العظمى و ترأست منظمة الكومنولث لمدة ٧٠ سنه و تَولَّى رئاسة وزراء بريطانيا في عهدها ١٥ رئيس وزراء مختلفين !

فترة حكمها هي أطول فترة حكم في تاريخ بريطانيا 🇬🇧

وتاني أطول فترة حكم في العالم على مر التاريخ 🌎 بعد الملك لويس الرابع عشر اللي حكم فرنسا لمدة ٧٢ سنه من ١٦٤٣ ل ١٧١٥. يعني الفرق بينهم حوالي سنتين بس.

📜 بعد وفاتها أصبح ملك بريطانيا هو أكبر أبناءها الأربعة تشارلز الثالث اللي عمره ٧٣ سنه حالياً، وأصبح ولي العهد أكبر أحفادها الثمانية الأمير ويليام وبعده ابنه الأمير جورج.

كان ممكن تشارلز يختار اسم ملكي غير اسمه لكنه احتفظ ب اسمه زي والدته.

👑 اليزابيث الثانية تولت الحكم وهي عندها ٢٥ سنه بعد وفاة والدها جورج السادس سنه ١٩٥٢. وتُوجت سنة ١٩٥٣ وكان أول تتويج يتذاع ف التلفزيون ever. وبقت رئيسة الكومنولث وال monarch ل ٧ دول من دول الكومنولث وهم المملكة المتحدة، كندا، أستراليا، نيوزيلندا، باكستان، جنوب أفريقيا، وسيريلانكا.

مع ذلك منصبها كملكة بريطانيا كانت سلطته محدودة ومتمثلة في انها بتصدق على القوانين اللي بيقرها البرلمان في بريطانيا، يعني هي مش رئيسة الحكومة (مش صاحبة قرار يعني)، لكن مش معنى كده انها مش مهمه، أهميتها كانت في وجودها نفسه وفي اتزانها والاستقرار اللي عملته في البلد بعد حالة الفوضى اللي سببتها الحرب العالمية الثانية.

⭐️ أهم انجازات في تاريخها:

- انجازها الحقيقي والأكبر هو ف استمراريتها، انها قدرت تستمر ملكة على العرش طول الفترة دي مع اختلاف العصور والبشر من حواليها وتفضيلها لمصلحة بلدها وخدمتها لشعبها ولكل دول الكومنولث. ماعملتش مثلاً زي عمها ادوارد الثامن اللي تنازل عن العرش. لكن كانت قد المسؤلية وفضلت في الحكم لآخر يوم ف عمرها وحافظت على ترابط البلد واستقراره.

- طورت منظمة الكومنولث و زاد عدد الدول المنضمة لحد ما وصل حالياً لحوالي ٥٤ دولة بيمثلوا حوالي ثلث سكان العالم وبعض الدول دي عمرها ما كانت جزء من الامبراطورية البريطانية لكن انضموا باختيارهم، والملكة ساعدت معظم دول الكومنولث يحققوا استقلالهم وكانت بتدعم المساواه والحرية وبتُدين التمييز العنصري والعرقي وأدانت نظام الفصل العنصري في جنوب افريقيا.

- غيرت نظام الحكم الملكي في بريطانيا اللي كان بيفضّل الذكور على الإناث، يعني لو البنت هي الأكبر وأخوها أصغر منها كان بيحكم قبلها لكن هي غيرت القانون ده وبقى الأكبر هو اللي يحكم بغض النظر عن انه ذكر أم أنثى والبرلمان وافق سنة ٢٠١٣ على القانون ده The Succession to the Crown Act 2013 واتفعل العمل بيه من ٢٠١٥.

- سنه ١٩٩١ أصبحت أول ملكة بريطانية تلقي خطاب في جلسة في الكونجرس الأمريكي بعد مرور قرنين على استقلال أمريكا عن الامبراطورية البريطانية. كان خطاب تاريخي للبلدين.

كمان كانت أول ملكة لكندا تفتتح جلسة برلمانية، بافتتاحها البرلمان الكندي الثالث والعشرين.

و كانت أول ملكة بريطانية تزور أيرلندا رسمياً بعد استقلالها وأثناء زيارتها حطت اكليل ورد على النصب التذكاري ل الأيرلنديين اللي ماتوا وهم بيحاربوا بريطانيا عشان ينالوا استقلالهم! و ده كان يعتبر اعتراف ضمني منها بضرورة حفظ العلاقات بين البلدين.

كمان كانت أول ملكة بريطانية حاكمة لأستراليا ونيوزلندا تزورهم بالفعل.

- صدق أو لا تصدق، بس هي غيرت عادات الملكية والرويال فاميلي عشان تكون أقل صرامة وأكثر تطور ومواكبة للعصر وأقرب للشعب؛ بظهورها في التلفزيون واسلوب خطاباتها وتعاملها المباشر مع الناس. كمان عملت فيلم وثائقي للرويال فاميلي وسمحت للمصورين يمشوا وراهم في القصر ويصوروا حياتهم العائلية الخاصة شهرين كاملين والفيلم فعلاً اتذاع سنة ١٩٦٩ وعمل أكتر من ٣٠ مليون مشاهدة. لكن يُقال انها ندمت بعد كده على قرار الفيلم الوثائقي ده ومنعت عرضه تاني.

وفتحت قصر باكنجهام للشعب وبقوا يقدروا يدخلوا القصر بتذاكر. جدير بالذكر إن القصور الملكية زي باكينجهام و ويندسور والمجموعة الملكية اللي بتشمل جواهر التاج البريطاني ومجموعة أعمال فنية تاريخية لا تعتبر من ممتلكاتها لكنها كانت تحت عهدتها ورعايتها.

كمان العائلة الملكية عشان يقربوا من الشعب أكتر عملوا أكونت على منصات السوشيال ميديا زي تويتر وانستجرام !

وكمان الملكة سهلت شروط الزواج والطلاق على أفراد الرويال فاميلي نفسهم وبقوا يتطلقوا عادي.

- بدأت الملكة تدفع ضرايب زي باقي الشعب في التسعينيات، بعد ما كانت معفية سنين طويلة.

- تطوعت في الجيش وهي عندها ١٨ سنه أثناء الحرب العالمية الثانية لأن كان عندها شغف وحب لخدمة بلدها، واتعلمت السواقة وميكانيكا السيارات في الوقت ده.

- سنة ٢٠٢١ حصلت على الرقم القياسي لموسوعة چينيس العالمية لأكبر عدد بلدان تترأسها في نفس الوقت، اللي هو ١٥ بلد من دول الكومنولث.

- كانت أكثر حاكمة سافرت في التاريخ بسبب زياراتها الرسمية وجولاتها في دول الكومنولث، تجاوزت رحلاتها المليون ميل ما يعادل ٤٢ رحلة حول محيط الكرة الأرضية بالكامل.

- كانت بترعى أكثر من ٦٠٠ منظمة وجمعية خيرية في شتى مناحي الحياة. ويعتقد أنها جمعت أكثر من مليار جنيه استرليني للأعمال الخيرية خلال فترة حكمها.

📰 اليزابيث الثانية كانت محبوبة من شعبها بصفة عامة ولها شعبية كبيرة في معظم أنحاء العالم مع ذلك تعرضت للانتقاد في حالات نادرة

أبرزها لما أيدن كان رئيس وزراء بريطانيا و شن العدوان الثلاثي على مصر بالتعاون مع فرنسا، و لورد مونتباتن قال انها كانت معارضه للحرب دي (مع انها لم تعلن عن آرائها السياسية الشخصية أبداً) لكن أيدن أنكر معارضتها وبعدها استقال وانتقدوا الطريقة اللي عينت بيها رئيس وزراء جديد بعده. وكررت نفس الغلطة تقريباً بعد ٦ سنين لما استقال رئيس الوزراء تاني ونصحها بتعيين واحد معين بعده وفعلاً عينته. بعدها تم عمل آلية رسمية لاختيار رئيس الوزراء عشان يرفعوا عنها الحرج.

و اتعرضت العائلة الملكية للانتقاد بسبب معاملتهم للأميرة ديانا. وحديثاً بسبب هاري وميجان.

⚰️ وفاتها:

طبعاً كان في خطة لاعلان وفاتها وكانوا مسمينها "Operation London Bridge” وبتشمل الخطة إن أول ما الطبيب يتأكد من وفاتها هيبلغ سكرتيرها الخاص اللي بدوره هيبلغ رئيس الوزراء برسالة يقوله فيها "London Bridge is down" ونفس الرسالة هتتبلغ لكل حكومات دول الكومنولث بعدين رئيس الوزراء هيبلغ بعض أفراد الحكومة بعدين يعلنوا وفاتها للشعب.

يوم وفاتها بيسموه D-Day واليوم اللي بعده D-Day+0 واللي بعده D-Day+1 وهكذا لحد يوم الجنازة اللي هو D-Day+10.

كمان كانوا عاملين خطة لو ماتت في اسكتلندا في مكانها المفضل ف بالمورال زي ما حصل بالفعل وكانوا مسمين خطة نقلها من اسكتلندا ل لندن Operation UNICORN اللي بتشمل نقلها من قلعة بالمورال ل قصر Holyroodhouse في ادنبره يوم D-Day+2 الموافق الأحد ١١ سبتمبر ويوم الاثنين هينقلوها لكاتدرائية St Giles’s ويوم الثلاثاء هيسفروها لندن بالطيارة لقصر باكنجهام.

بعدين يوم الأربعاء ١٤ سبتمبر هتبدأ عملية تانية اسم الكود بتاعها Operation LION و دي عملية موكب تابوت الملكة من قصر باكنجهام لقصر وستمنستر وهتبقى مسيرة عسكرية في طريق محدد طبعاً. بعد ما توصل قصر وستمنستر هيبدأوا عملية Operation Feather هيحطوا النعش بتاعها في نص القاعة في قصر وستمنستر والناس هتروح تعزي وتودعها وهيكون في تذاكر VIP للشخصيات المهمة وهيكون الدخول متاح على مدار ٢٣ ساعه في اليوم لمدة ٣ أيام.

بعد ما تم اعلان تشارلز ملك لبريطانيا. وألقي أول خطاب للشعب من لندن بصفته ملك، لازم يلف على اسكتلندا و ويلز وأيرلندا الشمالية عشان يقابل شعبه.

لما يرجع من الجولة دي هيعملوا الجنازة الرسمية في Westminster Abbey بعد ١٠ أيام من الوفاة D-Day+10 وهيسموا يوم الجنازة ده Day of National Mourning أعلنوا انها هتبقى يوم الاثنين ١٩ سبتمبر هيقفوا دقيقتين حداد في البلد بحالها، و أكدوا إن اليوم ده هيبقى اجازة bank holiday يعني معظم المصالح الحكومية والبنوك والمدارس هتقفل لكن مش اجباري إن أي شركة أو بزنس يقفلوا يعني القرار هيرجع لإدارة المكان هيقفل أو لأ -الرويال ميل أعلنوا انهم هيقفلوا وبعض المحلات التجارية- وطبعاً المدارس كلها هتقفل حتى لو ما بعتوش أي رسايل لأولياء الأمور. وبعد الجنازة هيدفنوها في Windsor Castle تحديداً في St George’s Chapel مع جوزها وأبوها.

بعد الدفن هيستمر الحداد لمدة ٧ أيام.

لكن حداد الرويال فاميلي نفسهم ممكن يستمر لحد شهر.

📱في عصر السوشيال ميديا تم الاتفاق انه أيام الحداد لازم كل المواقع الحكومية وأكونتات الرويال فاميلي تغير خلفية اللوجو والبانر بتاعها تبقى لونها أسود ولا يتم نشر أي بوستس غير ضرورية. وفي ايفنتس كتير مش ضرورية اتأجلت لحد ما تخلص فترة الحداد زي الألعاب الرياضية وماتشات الكوره وعلى سبيل المثال معظم مستشفيات ال NHS كنسلوا كل الاجتماعات اللي مش ضرورية و أي unnecessary communication على السوشيال ميديا وغيره.

💣 في لندن وفي بعض المواقع العسكرية في جميع أنحاء المملكة المتحدة، أطلقت المدافع تحية ٩٦ طلقة بعدد السنين اللي عاشتها، طلقة كل ١٠ ثواني.

🤴🏼مع إن تشارلز بقى ملك على طول بعد وفاتها لكن مش هيعمل مراسم التتوييج إلا بعد شهور غالباً هتكون في ٢٠٢٣ ان شاء الله. تفاصيل التتويج بتاعه لسه سرية لكن في معلومات بتقول انه حابب يكون الحفل بتاعه أقصر من بتاع الملكة اليزابيث الثانية اللي استمر ٣ ساعات ويكون أقل تكلفة من الحفل بتاعها اللي كلف حوالي مليون ونص جنية استرليني وقتها يعني ما يعادل حالياً ٤٦ مليون جنية استرليني لو ضفنا معدل التضخم.

💷 تبعات وفاتها:

- هيحتاجوا يغيروا شكل العملة و طوابع البريد والباسبورات والنشيد الوطني وكمان اليونيفورم بتاع البوليس والجيش اللي عليه رمز الملكة EIIR هيغيروه لرمز الملك الجديد وكل التغييرات دي طبعاً هتكلف كتير.

- مع ان رئاسة الكومنولث مش وراثة لكن الأعضاء وافقوا مسبقاً إن ولي العهد يحل مكان الملكة في رئاسة المنظمة، مع ذلك ممكن وفاتها تحفز التيار الجمهوري في بعض الدول اللي هي كانت رئيستها عشان يتخلصوا من الحكم الملكي أو يغيروا الدستور خصوصًا استراليا اللي عملوا استفتاء بالفعل قبل كده. كمان في دول كتير داخله الكومنولث باختيارها وبعد وفاتها ممكن ينسحبوا ويشوفوا مصالحهم مع منظمات تانية أقوى أو تخدم مصالحهم بشكل أفضل. زي ما بريطانيا نفسها شافت مصلحتها وانسحبت من الاتحاد الأوروبي.

- كمان متوقع ان وفاتها تسبب خسائر اقتصادية كبيرة لكن كلها لسه تكهنات وربنا يسترها علينا.

غالباً احنا داخلين على أيام سوده 😂

🖋 طبعاً كل اللي ذكرته في البوست فوق هو مجرد سرد لحقائق باسلوبي لكن لا يعبر عن أي آراء شخصية باستثناء آخر جملة 😂

🍂 بعد السنين اللي عاشتها دي كلها أهي خرجت زي ما دخلت ما اخدتش معاها القصور ولا المجوهرات وبعد ما ماتت الدنيا ماشيه عادي والناس بتضحك وتهزر وعايشه حياتها لكن اللي هيفضل بعد وفاتها عملها، الناس هتفتكرها باللي عملته سواء شايفين انه صح أو غلط دي آراءكم الشخصية، مش انتو اللي هتحاسبوها، لها من الله ما تستحقه.

ياريت تركزوا على أعمالكم انتو هل الناس هتفتكركم بالخير ولا بالشر ؟ وتحاولوا تستعدوا لمقابلة ربنا وتسيبوا بصمة خير في هذا العالم الذي به ما يكفي من القبح. وتسألوا نفسكم هل استنفذتوا كل محاولاتكم في جعل هذا العالم مكان أفضل ؟

#كفى_بالموت_واعظاً

#انجلترا_وسنينها